جمرود:گرلز پرائمری سکول تودہ میلہ ہاشم خان کلے میں گزشتہ 8 سال سے مستقل اساتذہ تعینات نہ کیے جانے کے خلاف مقامی افراد نے احتجاجا سکول کو تالے لگا دیے، جس کے باعث طالبات کی تعلیم کا سلسلہ متاثر ہوگیا۔
مقامی افراد کے مطابق سکول میں طویل عرصے سے مستقل اساتذہ کی کمی کا مسئلہ برقرار ہے، جس کے باعث طالبات کو تعلیمی سرگرمیوں کے حوالے سے مشکلات کا سامنا ہے۔
مقامی افراد نے مستقل اساتذہ کی عدم تعیناتی پر احتجاج کرتے ہوئے گورنمنٹ گرلز پرائمری سکول تودہ میلہ کو بند کردیا اور مطالبہ کیا کہ سکول میں فوری طور پر مستقل اساتذہ تعینات کیے جائیں تاکہ طالبات کی تعلیم کا سلسلہ بحال ہوسکے۔
مقامی افراد کا کہنا ہے کہ اساتذہ کی عدم دستیابی کے باعث سکول میں زیرتعلیم بچیوں کا تعلیمی مستقبل متاثر ہو رہا ہے اور متعلقہ حکام کو اس مسئلے کا فوری نوٹس لینا چاہیے۔
واضح رہے کہ گورنمنٹ گرلز پرائمری سکول تودہ میلہ وزیراعلیٰ خیبرپختونخوا سہیل آفریدی کے حلقہ پی کے 70میں واقع ہے۔
