وزیراعلیٰ خیبرپختونخوا محمد سہیل آفریدی سے رکن صوبائی اسمبلی عبدالغنی آفریدی نے ملاقات کی، جس میں حلقہ پی کے 71 کو درپیش عوامی مسائل، ترقیاتی منصوبوں اور دیگر اہم امور پر تفصیلی تبادلۂ خیال کیا گیا۔ ملاقات میں چیف سیکرٹری شہاب علی شاہ، صوبائی وزیر بلدیات مینا خان آفریدی اور صوبائی وزیر اطلاعات شفیع جان بھی موجود تھے۔
عبدالغنی آفریدی نے وزیراعلیٰ کو حلقے کے ترقیاتی منصوبوں، عوامی سہولیات، انتظامی امور اور مبینہ غیر ضروری مداخلت سے متعلق اپنے تحفظات سے آگاہ کیا۔ اس پر وزیراعلیٰ نے یقین دہانی کرائی کہ منتخب عوامی نمائندے کے آئینی، قانونی اور جمہوری اختیارات کا ہر صورت تحفظ یقینی بنایا جائے گا اور حلقے کے معاملات میں کسی غیر ضروری مداخلت کی اجازت نہیں دی جائے گی۔
وزیراعلیٰ نے متعلقہ سرکاری محکموں اور اداروں کو ہدایت کی کہ وہ حلقہ پی کے 71 میں ترقیاتی منصوبوں اور عوامی امور کے حوالے سے رکن اسمبلی عبدالغنی آفریدی کے ساتھ مکمل رابطہ اور مشاورت برقرار رکھیں تاکہ عوامی خدمت کا عمل مزید مؤثر اور شفاف بنایا جا سکے۔
ملاقات کے دوران وزیراعلیٰ نے اس بات پر بھی زور دیا کہ باہمی اختلافات اور تحفظات کو سوشل میڈیا کے بجائے پارٹی اور حکومتی فورمز پر مشاورت کے ذریعے حل کیا جانا چاہیے۔
ملاقات خوشگوار ماحول میں اختتام پذیر ہوئی، جس میں حلقہ پی کے 71 کی ترقی، عوامی مسائل کے فوری حل، منتخب نمائندے کے اختیارات کے احترام اور حکومتی رابطہ کاری کو مزید مؤثر بنانے پر اتفاق کیا گیا۔
