جماعت اسلامی کی جانب سے پیٹرولیم مصنوعات کی قیمتوں اور پیٹرولیم لیوی میں اضافے کے خلاف آج کراچی، پشاور، کوئٹہ اور لاہور میں دھرنوں کا اعلان کیا گیا ہے۔ کراچی، پشاور اور کوئٹہ میں گورنر ہاؤسز جبکہ لاہور میں وزیراعلیٰ ہاؤس کے باہر احتجاجی دھرنے دیے جائیں گے۔ جماعت اسلامی کے مطابق دھرنوں کا آغاز سہ پہر 3 بجے ہوگا۔
امیر جماعت اسلامی حافظ نعیم الرحمن نے کہا ہے کہ جماعت اسلامی عوام کے حقوق کے لیے جدوجہد کر رہی ہے اور احتجاج کا مقصد پیٹرولیم لیوی کے خاتمے اور پیٹرول کی قیمت میں کمی کے مطالبات کو منوانا ہے۔ ان کا کہنا تھا کہ پیٹرولیم مصنوعات مہنگی ہونے سے اشیائے ضروریہ سمیت ہر چیز کی قیمت متاثر ہوتی ہے۔
حافظ نعیم الرحمن نے پنجاب کے نوجوانوں سے احتجاج میں شرکت کی اپیل کرتے ہوئے کہا کہ لاہور میں تاریخی مارچ کرتے ہوئے وزیراعلیٰ ہاؤس پہنچ کر دھرنا دیا جائے گا۔ ان کے بقول کراچی، پشاور اور کوئٹہ میں بھی گورنر ہاؤسز کے باہر عوام کی بڑی تعداد احتجاج میں شریک ہوگی۔
جماعت اسلامی کے رہنما نے دعویٰ کیا کہ گزشتہ ہفتے بھی پیٹرولیم مصنوعات کی قیمتوں اور لیوی کے خلاف ملک بھر میں تقریباً 500 سے زائد مقامات پر احتجاج کیا گیا تھا۔ جماعت اسلامی کا کہنا ہے کہ مطالبات کی منظوری تک احتجاجی تحریک جاری رکھی جائے گی
