صوبائی مینجمنٹ سروس آفیسرز ایسوسی ایشن خیبرپختونخوا نے وزیراعظم پاکستان سے مطالبہ کیا ہے کہ دہشت گردی سے متاثرہ اور حساس اضلاع میں تعینات پی ایم ایس افسران کو بھی غیر معمولی لااینڈ آرڈر و سکیورٹی رسک الاونس دیا جائے۔
ایسوسی ایشن کے چیئرمین نعمان وزیر نے وزیراعظم کو ارسال کردہ خط میں کہا ہے کہ اسٹیبلشمنٹ ڈویژن نے خیبرپختونخوا کے دہشت زدہ اور شدید متاثرہ اضلاع میں تعینات پاکستان ایڈمنسٹریٹو سروس اور پولیس سروس آف پاکستان افسران کے لیے یکم جولائی 2026 سے الاونس منظور کیا ہے تاہم پی ایم ایس افسران کو اس سے محروم رکھا گیا ہے۔
خط میں موقف اختیار کیا گیا کہ پی ایم ایس افسران انہی اضلاع میں وہی انتظامی، مجسٹریسی اور لااینڈ آرڈر سے متعلق فرائض انجام دیتے ہیں، جہاں دیگر افسران تعیناتی سے گریز کرتے ہیں۔
بقول ایسوسی ایشن، بنوں، لکی مروت، ڈی آئی خان، کرم، باجوڑ، وزیرستان اور ملاکنڈ سمیت حساس علاقوں میں پی ایم ایس افسران دہشت گردی کے واقعات، نقل مکانی اور ہنگامی حالات میں فرنٹ لائن پر خدمات انجام دے رہے ہیں۔
ایسوسی ایشن کے مطابق پی ایم ایس افسران ضلعی انتظامیہ کا تقریبا 90 فیصد حصہ ہیں جبکہ دو پی ایم ایس افسران باجوڑ اور شمالی وزیرستان میں فرائض کی ادائیگی کے دوران شہید ہو چکے ہیں۔
ایسوسی ایشن نے وزیراعظم سے مطالبہ کیا کہ متعلقہ حکم میں ترمیم کرکے پی ایم ایس افسران کو بھی یکم جولائی 2026 سے اسی بنیاد پر الاونس کا حقدار قرار دیا جائے۔
