محمد سہیل آفریدی سے ایشیا ئی ترقیاتی بینک کی کنٹری ڈائریکٹر ایما فان نے ملاقات کی، جس میں صوبے میں جاری ترقیاتی منصوبوں اور مستقبل میں باہمی تعاون کے فروغ پر تفصیلی تبادلہ خیال کیا گیا۔
ملاقات کے دوران وزیراعلیٰ نے بتایا کہ خیبر پختونخوا حکومت انسانی سرمایہ کاری (ہیومن کیپیٹل)، روزگار کے مواقع اور بنیادی ڈھانچے کی بہتری پر توجہ دے رہی ہے۔ انہوں نے کہا کہ تعلیم اور صحت حکومت کے ترجیحی شعبے ہیں، جبکہ سڑکوں، شہری سہولیات اور دیگر بنیادی ڈھانچے کی ری ویمپنگ جاری ہے۔
وزیراعلیٰ نے خاص طور پر ضم اضلاع کی ترقی کو حکومت کی اولین ترجیحات میں شامل قرار دیتے ہوئے اعلان کیا کہ ان علاقوں کے لیے ایک ہزار ارب روپے کا جامع ترقیاتی پیکج تشکیل دیا گیا ہے، جس کے تحت خصوصی سرمایہ کاری کی جائے گی۔ انہوں نے کہا کہ یہ اقدامات ضم اضلاع کو قومی ترقی کے دھارے میں مؤثر انداز میں شامل کرنے کے لیے کیے جا رہے ہیں۔
اس موقع پر ایشیا ئی ترقیاتی بینک نے بھی صوبے میں جاری ترقیاتی منصوبوں کے لیے تعاون جاری رکھنے کا اعادہ کیا اور حکومت کی اصلاحاتی کوششوں کو سراہا۔
ملاقات میں یہ بھی طے پایا کہ مشترکہ منصوبوں کو مزید شفاف، مؤثر اور پائیدار بنایا جائے گا تاکہ ترقی کے زیادہ سے زیادہ فوائد عوام تک پہنچ سکیں اور ضم اضلاع میں سرمایہ کاری اور روزگار کے نئے مواقع پیدا کیے جا سکیں۔
