تھانہ شادی خیل کی حدود میں نامعلوم افراد کی جانب سے ایک پولیس اہلکار کے گھر پر بارودی حملے کا واقعہ پیش آیا ہے، جس کے نتیجے میں عمارت کو شدید نقصان پہنچا، تاہم خوش قسمتی سے کوئی جانی نقصان نہیں ہوا۔
پولیس کے مطابق یہ واقعہ شادی خیل کے علاقے میں اس وقت پیش آیا جب نامعلوم ملزمان نے پولیس اہلکار تحصیل خان کے گھر کو نشانہ بنایا۔ دھماکہ اس قدر شدید تھا کہ اہلکار کی بیٹھک مکمل طور پر منہدم ہو گئی اور اطراف میں موجود دیواروں کو بھی نقصان پہنچا۔
واقعے کی اطلاع ملتے ہی پولیس اور دیگر قانون نافذ کرنے والے اداروں کی بھاری نفری فوری طور پر جائے وقوعہ پر پہنچ گئی۔ علاقے کو گھیرے میں لے کر سرچ آپریشن شروع کر دیا گیا، جبکہ بم ڈسپوزل اسکواڈ نے شواہد اکٹھے کر کے دھماکے کی نوعیت جاننے کے لیے تحقیقات کا آغاز کر دیا ہے۔
پولیس حکام کا کہنا ہے کہ ابتدائی طور پر واقعے کی نوعیت ٹارگٹڈ کارروائی معلوم ہوتی ہے، تاہم اس کے محرکات کے تعین کے لیے مختلف پہلوؤں سے تحقیقات جاری ہیں۔ ذرائع کے مطابق حملہ آور جائے وقوعہ سے فرار ہونے میں کامیاب ہو گئے۔
مقامی افراد کے مطابق دھماکے کی آواز دور دور تک سنی گئی جس سے علاقے میں خوف و ہراس پھیل گیا۔ سیکیورٹی خدشات کے پیش نظر علاقے میں گشت بڑھا دیا گیا ہے۔
پولیس کا کہنا ہے کہ واقعے میں ملوث عناصر کو جلد گرفتار کرنے کے لیے کارروائیاں تیز کر دی گئی ہیں اور قریبی علاقوں میں ناکہ بندی بھی کی جا رہی ہے۔
