تالاش کے علاقے چینو گائوں میں گزشتہ تقریبا تین ماہ سے واٹر سپلائی کی بندش کے باعث عوام کو شدید مشکلات کا سامنا ہے۔
اہل علاقہ کے مطابق واٹر سپلائی بند ہونے سے پینے کے صاف پانی کی شدید قلت پیدا ہوگئی ہے جبکہ خواتین، بچوں اور بزرگوں سمیت شہری پانی کے حصول کے لیے مشکلات سے دوچار ہیں۔
چینو گائوں کے عوام اور مشران نے رکن صوبائی اسمبلی ملک شفیع اللہ خان سے مطالبہ کیا ہے کہ علاقے میں گزشتہ تین ماہ سے بند واٹر سپلائی کا مسئلہ فوری طور پر حل کرکے عوام کو پینے کا صاف پانی فراہم کیا جائے۔
اس حوالے سے منعقدہ جرگے میں مشران نے فیصلہ کیا کہ اگر واٹر سپلائی کا مسئلہ فوری طور پر حل نہ کیا گیا تو چینو گائوں کے مشران باقاعدہ پریس کانفرنس کرکے آئندہ کے لائحہ عمل کا اعلان کریں گے۔
