کوئٹہ: بلوچستان میں پاک فوج، ایف سی بلوچستان اور پولیس کا مشترکہ آپریشن شعبان کامیابی سے جاری ہے، جس کے دوران سیکیورٹی فورسز دہشتگردوں کے خلاف فضائی اور زمینی کارروائیاں کر رہی ہیں۔
سیکیورٹی ذرائع کے مطابق حالیہ کارروائیوں میں مزید 4 دہشتگرد ہلاک ہوئے ہیں، جس کے بعد آپریشن شعبان کے آغاز سے اب تک ہلاک ہونے والے دہشتگردوں کی مجموعی تعداد 83 ہوگئی ہے۔ ذرائع کا کہنا ہے کہ ان کارروائیوں کے نتیجے میں دہشتگرد گروہوں کو بھاری نقصان پہنچا ہے۔
سیکیورٹی ذرائع کے مطابق بلوچستان میں امن و امان کی صورتحال بہتر بنانے اور دہشتگرد عناصر کے خاتمے کے لیے آپریشن بھرپور انداز میں جاری ہے۔
ذرائع نے مزید بتایا کہ 5 جولائی سے اب تک آپریشن شعبان اور دیگر انٹیلی جنس بیسڈ آپریشنز (IBOs) کے دوران مجموعی طور پر 121 دہشتگرد ہلاک کیے جا چکے ہیں۔
سیکیورٹی فورسز کے مطابق بلوچستان میں دہشتگردی کے خاتمے اور پائیدار امن کے قیام کے لیے کارروائیاں آخری دہشتگرد کے خاتمے تک جاری رہیں گی۔
