ڈپٹی کمشنر ٹانک جمشید خان کے ڈی ایچ کیو ہسپتال ٹانک کے اچانک دورے کے دوران مین میڈیسن اسٹور میں سنگین بے قاعدگیوں کا انکشاف ہوا ہے، جس پر ہسپتال انتظامیہ نے اسٹور کیپر امجد خان کو فوری طور پر معطل کرتے ہوئے معاملے کی تحقیقات کے لیے دو رکنی انکوائری کمیٹی تشکیل دے دی۔
ڈی ایچ کیو ہسپتال ٹانک کے میڈیکل سپرنٹنڈنٹ کی جانب سے جاری کردہ مراسلے کے مطابق ڈپٹی کمشنر ٹانک نے اسسٹنٹ کمشنر جنڈولہ جمشید عالم کے ہمراہ ہسپتال کا اچانک دورہ کیا، جس کے دوران مین میڈیسن اسٹور میں متعدد بے قاعدگیاں سامنے آئیں۔
مراسلے کے مطابق اسٹور میں ادویات کے اسٹاک کا ریکارڈ مناسب طریقے سے مرتب اور برقرار نہیں رکھا گیا تھا، ادویات کے لیے مطلوبہ درجہ حرارت برقرار رکھنے اور اس کا ریکارڈ رکھنے میں بھی غفلت پائی گئی، جبکہ آئی وی فلوئڈز کو مقررہ ریکس کے بجائے براہِ راست فرش پر رکھا گیا تھا۔
ڈپٹی کمشنر کی ہدایات پر اسٹور کیپر امجد خان کو فوری طور پر معطل کردیا گیا ہے۔
معاملے کی مکمل تحقیقات کے لیے دو رکنی انکوائری کمیٹی تشکیل دی گئی ہے، جس میں ڈاکٹر حضرت شاہ، سینئر میڈیکل آفیسر، چیئرمین جبکہ ڈاکٹر اسحاق شاہ، میڈیکل آفیسر، رکن ہوں گے۔
انکوائری کمیٹی کو ہسپتال کے میڈیسن اسٹور کے ادویات کے ذخیرے، اسٹاک رجسٹرز اور تقسیم کے ریکارڈ کا جائزہ لینے، ادویات اور آئی وی فلوئڈز کو فرش پر رکھنے کی وجوہات کا تعین کرنے، حساس ادویات کے لیے مطلوبہ درجہ حرارت برقرار نہ رکھنے اور اس کا ریکارڈ درج نہ کرنے کی وجوہات معلوم کرنے کی ہدایت کی گئی ہے۔
کمیٹی معطل اسٹور کیپر کا بیان بھی قلمبند کرے گی اور غفلت یا ذمہ داری کا تعین کرتے ہوئے اپنی سفارشات مرتب کرے گی۔
میڈیکل سپرنٹنڈنٹ کی جانب سے انکوائری کمیٹی کو تین دن کے اندر تفصیلی رپورٹ اور واضح سفارشات پیش کرنے کی ہدایت کی گئی ہے۔
