ٹانک: خیبرپختونخوا کے ضلع ٹانک میں دہشت گردوں کی جانب سے پولیس کی بکتر بند گاڑی کو دھماکے کا نشانہ بنایا گیا، جس کے نتیجے میں اے ایس آئی فرید اللہ سمیت دو پولیس اہلکار شہید جبکہ تین اہلکار شدید زخمی ہو گئے۔
پولیس کے مطابق بکتر بند گاڑی معمول کے گشت پر تھی کہ ٹانک وزیرستان مین روڈ کے کنارے نصب دیسی ساختہ بم (آئی ای ڈی) زور دار دھماکے سے پھٹ گیا، جس سے گاڑی کو شدید نقصان پہنچا۔
واقعے کے فوراً بعد شہید اور زخمی اہلکاروں کو ڈسٹرکٹ ہیڈکوارٹر (ڈی ایچ کیو) ہسپتال ٹانک منتقل کر دیا گیا، جہاں زخمی اہلکاروں کو طبی امداد فراہم کی جا رہی ہے۔
دھماکے کے بعد پولیس اور دیگر سیکیورٹی فورسز نے علاقے کو گھیرے میں لے کر حملہ آوروں کی تلاش کے لیے بڑے پیمانے پر سرچ آپریشن شروع کر دیا ہے۔ حکام کے مطابق تاحال کسی تنظیم نے حملے کی ذمہ داری قبول نہیں کی، جبکہ واقعے کی تحقیقات جاری ہیں۔
