مردان میں اراضی تنازعہ خونریز تصادم میں تبدیل، دو خواتین سمیت تین افراد قتل
مردان: ضلع مردان کے علاقے کھنڈرے گڑھی کپورہ میں اراضی کے تنازعے پر فائرنگ کے نتیجے میں دو خواتین سمیت تین افراد جاں بحق ہوگئے، جبکہ واقعے کے بعد علاقے میں خوف و ہراس پھیل گیا ہے۔
پولیس اور مقامی ذرائع کے مطابق افسوسناک واقعہ ایک رہائشی گھر کے اندر پیش آیا، جہاں مبینہ طور پر اراضی کے دیرینہ تنازعے پر فریقین کے درمیان تلخ کلامی کے بعد فائرنگ شروع ہوگئی۔ فائرنگ کے نتیجے میں دو خواتین مسماۃ (ر) اور (س) کے علاوہ اجمل نامی شخص موقع پر ہی جاں بحق ہوگیا۔
ذرائع کا کہنا ہے کہ مقتولین اور ملزمان آپس میں قریبی رشتہ دار ہیں اور دونوں خاندانوں کے درمیان کافی عرصے سے زمین کا تنازعہ چل رہا تھا، جو مبینہ طور پر اچانک خونریز تصادم کی صورت اختیار کر گیا۔
مردان پولیس نے واقعے کا مقدمہ درج کرتے ہوئے بلال، مبصر، نورالبصور، علی زمان اور شاہ فاضل کو نامزد ملزمان قرار دیا ہے۔ پولیس کے مطابق واقعے کی مختلف پہلوؤں سے تفتیش جاری ہے جبکہ ملزمان کی گرفتاری کے لیے چھاپے مارے جا رہے ہیں۔
واقعے کی اطلاع ملتے ہی پولیس کی بھاری نفری موقع پر پہنچ گئی اور جائے وقوعہ سے شواہد اکٹھے کر کے لاشوں کو ضروری قانونی کارروائی کے لیے ہسپتال منتقل کر دیا گیا۔ بعد ازاں لاشیں ورثا کے حوالے کر دی گئیں۔
دو خواتین سمیت تین افراد کے قتل کے اس دلخراش واقعے کے بعد علاقے میں شدید خوف و ہراس پایا جا رہا ہے۔ مقامی افراد نے واقعے پر گہرے دکھ اور افسوس کا اظہار کرتے ہوئے مطالبہ کیا ہے کہ ملزمان کو جلد از جلد گرفتار کر کے قانون کے مطابق سخت سزا دی جائے۔
پولیس حکام کا کہنا ہے کہ واقعے میں ملوث تمام افراد کو قانون کے کٹہرے میں لایا جائے گا اور تفتیش مکمل ہونے کے بعد مزید حقائق سامنے لائے جائیں گے۔
