بنوں: ضلع بنوں کے علاقے اودین کلے میں جائیداد کے پرانے تنازع پر فائرنگ کے واقعے میں ایک ہی خاندان کے چار افراد جاں بحق ہوگئے، جس کے بعد علاقے میں خوف و ہراس پھیل گیا۔
ریسکیو ذرائع کے مطابق واقعہ رات گئے پیش آیا جب فریقین کے درمیان جاری تنازع اچانک شدت اختیار کر گیا اور فائرنگ شروع ہوگئی۔ فائرنگ کے نتیجے میں عمر نواز، مطیع اللہ، فرمان اللہ اور عمیر شدید زخمی ہوئے جنہیں ریسکیو 1122 کی ٹیم نے فوری طور پر آر ایچ سی ڈومیل منتقل کیا، تاہم اسپتال میں ڈاکٹروں نے چاروں کی ہلاکت کی تصدیق کر دی۔
ذرائع کے مطابق جاں بحق افراد میں ایک والد اور اس کے دو بیٹے شامل ہیں جبکہ چوتھا شخص قریبی رشتہ دار بتایا جاتا ہے۔
پولیس کے مطابق ابتدائی تحقیقات سے معلوم ہوا ہے کہ واقعہ دیرینہ جائیداد کے تنازع کا شاخسانہ ہے، جو گزشتہ رات خونی تصادم میں تبدیل ہو گیا۔ پولیس نے واقعے کی تحقیقات شروع کر دی ہیں اور ملوث افراد کی گرفتاری کے لیے کارروائیاں جاری ہیں۔
مقامی ذرائع کا کہنا ہے کہ تنازع کافی عرصے سے زیر التوا تھا، تاہم گزشتہ رات صورتحال بگڑنے پر یہ افسوسناک واقعہ پیش آیا۔
