مراد سعید کی خالی ہونے والی سینیٹ نشست پر ضمنی انتخاب کے لیے اپوزیشن جماعتوں نے مشترکہ طور پر الیکشن لڑنے پر اتفاق کر لیا۔
پشاور کے مفتی محمود مرکز میں ہونے والے اہم اجلاس کی صدارت جمعیت علمائے اسلام (ف) خیبرپختونخوا کے صوبائی امیر سینیٹر مولانا عطاء الرحمان نے کی۔ اجلاس میں پاکستان مسلم لیگ (ن)، پاکستان پیپلز پارٹی، عوامی نیشنل پارٹی اور پاکستان تحریک انصاف پارلیمنٹرینز کی صوبائی قیادت نے شرکت کی۔
اجلاس کے دوران اپوزیشن جماعتوں نے متفقہ حکمت عملی اختیار کرتے ہوئے فیصلہ کیا کہ سینیٹ کی اس نشست پر مشترکہ امیدوار میدان میں اتارا جائے گا تاکہ مقابلہ مؤثر بنایا جا سکے۔
ذرائع کے مطابق جمعیت علمائے اسلام (ف) کی جانب سے مولانا عبدالحسیب حقانی کو سینیٹ کی نشست کے لیے امیدوار نامزد کیا گیا ہے، جس کی دیگر اپوزیشن جماعتوں کی جانب سے حمایت کا امکان ظاہر کیا جا رہا ہے۔
سیاسی مبصرین کے مطابق اپوزیشن کا یہ اتحاد صوبے کی سیاست میں اہم پیش رفت قرار دیا جا رہا ہے اور آئندہ ضمنی انتخاب میں دلچسپ مقابلے کی توقع کی جا رہی ہے
