پشاور(نیوزرپورٹر)خیبرپختونخوا پرائیویٹ سکولز ریگولیٹری اتھارٹی نے صوبے کے تمام نجی سکولوں کے سربراہان کو 14 اگست کو ہونے والی میگا شجرکاری مہم میں طلبہ کی بھرپور شرکت یقینی بنانے کی ہدایت کردی۔
پی ایس آر اے کی جانب سے جاری مراسلے کے مطابق صوبائی حکومت کے ”گرین خیبرپختونخوا“ اقدام کے تحت یوم آزادی کے موقع پر 14 اگست کو صوبے بھر میں شجرکاری مہم چلائی جائے گی، جس کے دوران ایک ہی روز 14 لاکھ پودے لگانے کا ہدف مقرر کیا گیا ہے۔
مراسلے میں کہا گیا ہے کہ اس اقدام کا مقصد ملک میں سرسبز اور پائیدار ماحول کے فروغ کے ساتھ یوم آزادی کو منفرد انداز میں منانا ہے۔ تمام نجی سکولوں کے سربراہان کو متعلقہ ضلعی انتظامیہ کے ساتھ قریبی رابطہ رکھنے اور 14 اگست کو ہونے والی میگا شجرکاری مہم میں طلبہ کی زیادہ سے زیادہ شرکت یقینی بنانے کی ہدایت کی گئی ہے۔
پی ایس آر اے نے اپنے متعلقہ افسران کو بھی ہدایات پر عملدرآمد یقینی بنانے جبکہ مراسلہ تمام نجی سکولوں کے سربراہان تک آن لائن پورٹل کے ذریعے پہنچانے کی ہدایت کی ہے۔
