لوئر دیر: ضلع لوئر دیر میں دہشت گردوں نے پولیس کے قافلے پر دستی بموں اور خودکار ہتھیاروں سے حملہ کر دیا، جس کے نتیجے میں 2 پولیس اہلکار شہید جبکہ 19 اہلکار زخمی ہو گئے۔
پولیس کے مطابق حملہ لڑم ٹاپ کے قریب حیدر کے مقام پر اس وقت کیا گیا جب پولیس کا قافلہ معمول کی نقل و حرکت میں مصروف تھا۔ دہشت گردوں نے پہلے دستی بموں سے حملہ کیا اور اس کے بعد خودکار ہتھیاروں سے شدید فائرنگ کی۔
حملے کے دوران دہشت گردوں نے پولیس کی دو گاڑیوں کو بھی نذرِ آتش کر دیا، جس سے گاڑیوں کو شدید نقصان پہنچا۔
واقعے کے بعد زخمی اہلکاروں کو فوری طور پر ڈسٹرکٹ ہیڈ کوارٹر ہسپتال تیمرگرہ اور چکدرہ ہسپتال منتقل کیا گیا، جہاں انہیں طبی امداد فراہم کی جا رہی ہے۔
پولیس کا کہنا ہے کہ واقعے کی مزید تحقیقات جاری ہیں اور صورتحال واضح ہونے پر مزید تفصیلات جاری کی جائیں گی۔ دوسری جانب سکیورٹی فورسز نے علاقے کو گھیرے میں لے کر حملہ آوروں کی تلاش کے لیے سرچ آپریشن شروع کر دیا ہے۔
