دیر پائین کی تحصیل میدان میں ایک افسوسناک ٹریفک حادثہ پیش آیا ہے جس کے نتیجے میں خاتون سمیت 3 افراد جاں بحق جبکہ 10 سے زائد افراد زخمی ہو گئے۔
تفصیلات کے مطابق یہ دلخراش واقعہ تحصیل میدان کے علاقے نامباتئی میں پیش آیا، جہاں ایک مسافر گاڑی بے قابو ہو کر گہری کھائی میں جا گری۔ حادثہ اس قدر شدید تھا کہ موقع پر ہی خاتون سمیت تین افراد جان کی بازی ہار گئے، جبکہ خواتین سمیت متعدد افراد شدید زخمی ہو گئے۔
ریسکیو ذرائع کے مطابق زخمیوں کو فوری طور پر قریبی ہسپتال منتقل کر دیا گیا ہے جہاں انہیں طبی امداد فراہم کی جا رہی ہے۔ بعض زخمیوں کی حالت تشویشناک بتائی جا رہی ہے جس کے باعث ہلاکتوں میں اضافے کا خدشہ ظاہر کیا جا رہا ہے۔
واقعے کی اطلاع ملتے ہی مقامی افراد بڑی تعداد میں ہسپتال پہنچ گئے اور امدادی کارروائیوں میں حصہ لیا، جبکہ علاقے کی فضا سوگوار ہو گئی۔
دوسری جانب ممبر صوبائی اسمبلی نے حادثے پر گہرے دکھ اور افسوس کا اظہار کرتے ہوئے ہسپتال انتظامیہ کو ہدایت کی ہے کہ زخمیوں کو فوری اور بہترین طبی سہولیات فراہم کی جائیں۔
اہل علاقہ نے متعلقہ حکام سے مطالبہ کیا ہے کہ سڑکوں کی خراب صورتحال اور ٹریفک قوانین پر عملدرآمد یقینی بنایا جائے تاکہ مستقبل میں ایسے المناک حادثات سے بچا جا سکے۔
