ضلع کوہاٹ کی تحصیل لاچی کے نواحی پہاڑی گاؤں مالگین میں شدید بارش کے دوران کچے مکان کی چھت گرنے سے خواتین اور بچوں سمیت 11 افراد جاں بحق جبکہ 12 افراد زخمی ہوگئے۔
ریسکیو 1122 کے مطابق حادثہ ایک تقریب کے دوران پیش آیا، جب متعدد افراد مکان کے اندر موجود تھے۔ اطلاع ملتے ہی امدادی ٹیمیں جائے وقوعہ پر پہنچ گئیں اور ملبے تلے دبے افراد کو نکال کر ابتدائی طبی امداد فراہم کی۔ زخمیوں کو مختلف ہسپتالوں میں منتقل کر دیا گیا، جن میں خواتین اور بچوں کی بڑی تعداد شامل ہے۔
ریسکیو حکام کے مطابق امدادی کارروائی کے دوران مزید لاشیں ملبے سے نکالی گئیں، جس کے بعد جاں بحق افراد کی تعداد 11 ہو گئی۔ حکام کا کہنا ہے کہ امدادی آپریشن مکمل کر لیا گیا ہے جبکہ متاثرہ خاندانوں کو ہر ممکن سہولت فراہم کی جا رہی ہے۔
خیبرپختونخوا کے وزیر اطلاعات شفیع جان نے واقعے پر گہرے دکھ اور افسوس کا اظہار کرتے ہوئے کہا کہ قیمتی انسانی جانوں کا ضیاع انتہائی افسوسناک ہے۔ انہوں نے بتایا کہ زخمیوں کو بہترین طبی سہولیات فراہم کی جا رہی ہیں اور صوبائی حکومت متاثرہ خاندانوں کو ہر ممکن امداد اور تعاون فراہم کرے گی۔ وزیر اطلاعات نے جاں بحق افراد کی مغفرت اور زخمیوں کی جلد صحت یابی کے لیے دعا بھی کی۔
ماہرین نے مسلسل بارشوں کے دوران کچے اور خستہ حال مکانات میں رہائش اختیار کرنے سے گریز کرنے اور مقامی انتظامیہ کی حفاظتی ہدایات پر عمل کرنے کی ضرورت پر زور دیا ہے۔
