ضلع کرم کے مرکزی شہر پاراچنار میں پاسپورٹ آفس گزشتہ کئی روز سے بند ہونے کے باعث شہری شدید مشکلات کا شکار ہیں۔ عملے کی عدم موجودگی کے سبب دفتر کے تمام سرکاری امور معطل ہیں، جس سے پاسپورٹ سے متعلق خدمات مکمل طور پر متاثر ہو گئی ہیں۔
ذرائع کے مطابق پاسپورٹ آفس کے موجودہ عملے کا تبادلہ کر دیا گیا ہے، تاہم تاحال نئے عملے کی تعیناتی نہیں کی گئی، جس کے باعث دفتر میں معمول کا کام شروع نہیں ہو سکا۔
مقامی شہریوں کا کہنا ہے کہ وہ کئی روز سے پاسپورٹ آفس کے چکر لگا رہے ہیں، مگر عملہ موجود نہ ہونے کی وجہ سے انہیں ہر بار مایوس ہو کر واپس جانا پڑتا ہے۔ ایک شہری نے بتایا کہ وہ گزشتہ ایک ہفتے سے روزانہ دفتر آ رہا ہے، لیکن متعلقہ عملہ نہ ہونے کے باعث اس کا کام نہیں ہو پا رہا۔
پاسپورٹ آفس کی بندش سے بیرونِ ملک تعلیم، روزگار یا دیگر ضروری مقاصد کے لیے سفر کرنے والے افراد کو سب سے زیادہ مشکلات کا سامنا ہے۔ شہریوں کا کہنا ہے کہ ان کے اہم معاملات التوا کا شکار ہیں اور انہیں غیر یقینی صورتحال کا سامنا ہے۔
علاقہ مکینوں کے مطابق دفتر آنے والے شہریوں کو گیٹ پر موجود پولیس اہلکار عملے کی عدم موجودگی سے آگاہ کرتے ہیں، جبکہ اس حوالے سے پیشگی اطلاع یا عوامی آگاہی کا کوئی مؤثر انتظام نہیں کیا گیا۔ ان کا کہنا ہے کہ دور دراز علاقوں سے سفر کر کے آنے والے افراد کو شدید ذہنی، مالی اور وقتی نقصان برداشت کرنا پڑ رہا ہے۔
شہریوں نے حکومت، ڈائریکٹوریٹ آف پاسپورٹس اور ضلعی انتظامیہ سے مطالبہ کیا ہے کہ پاراچنار پاسپورٹ آفس میں فوری طور پر نئے عملے کی تعیناتی عمل میں لائی جائے تاکہ پاسپورٹ سے متعلق تمام خدمات بحال ہوں اور عوام کو درپیش مشکلات کا خاتمہ کیا جا سکے۔
