خیبرپختونخوا میں بارش کا سلسلہ جاری ، پاک افغان شاہراہ پر سیلابی صورتحال، ایک بچہ جاں بحق

ملک کی دیگر حصوں کی طرح خیبرپختونخوا میں بھی بارش کا سلسلہ جاری ہے،جس کے باعث صوبہ کے بالائی اضلاع و میدانی علاقوں سمیت پاک افغان شاہراہ پر سیلابی صورتحال پیدا ہو گئی ہے، جبکہ بعض مقامات ندی نالے ابل پڑے ہیں، اور پانی سڑکوں پر تیرنے لگا۔ضلع خیبر کے علاقے لنڈیکوتل کے دور افتادہ علاقہ بازار زخہ خیل میں کمرے کی چھت گرنے کا واقعہ رونما ہوا جس میں ایک بچہ جاں بحق اور تین افراد زخمی ہوئے ہیں، اس حوالے سے بتایا گیا کہ گزشتہ رات سے تیز بارشوں سے مختلف علاقوں میں دیواروں اور چھتیں گرنے کی اطلاعات زیرگردش ہیں، کئی مقامات پر تیز بارشوں سے ندل نالے ابل پڑے ہیں اور سیلابی ریلوں نے پھر آبادی کا رخ کر لیا، پاک افغان شاہراہ پر سیلابی صورتحال بھی رنگ دکھانے لگی ہے، جبکہ اس سیلابی ریلے سے پاک افغان شاہراہ مختلف مقامات پر بند ہو گئی ہے۔زرائع نے بتایا ہے کہ سیلابی ریلے کی وجہ سے جہاں شاہراہ بند ہو گئی ہے وہیں میٹرک امتحانات میں پرچہ ایک گھنٹہ تاخیر سے شروع ہوا، کیونکہ طلبہ راستے میں پھنس کر رہ گئے تھے۔ادھر ضلع مردان کے علاقے رستم میں تیز بارش کا سلسلہ جاری ہے جس سے موسم خوشگوار ہو گیا ہے، جبکہ سردی کی شدت میں بھی اضافہ دیکھا جانے لگا ہے، ٹھنڈی ہواں کے ساتھ بادلوں کا راج وقفے وقفے سے بارش ہونے سے سردیاں دوبارہ سے لوٹ آئی ہیں۔محکمہ موسمیات نے مزید بارش کی پیشگوئی کرتے ہوئے الرٹ بھی جاری کر دیا ہے، تاکہ عوام احتیاطی تدابیر اختیار کریں، ضلع سوات میں بھی دیگر اضلاع کی طرح بارش کا سلسلہ گزشتہ 24 گھنٹوں سے جاری ہے، جس سے موسم انتہائی سرد ہو گیا، اس سے جہاں دیگر علاقوں میں سیلابی صورتحال پیدا ہونے لگی ہے وہیں سوات کے زرعی ماہرین نے بتایا کہ موجودہ بارش فصلوں کے لئے انتہائی مفید ہے۔دوسری طرف ضلع صوابی اور گردونواح میں بارش کے باعث موسم خوش گوار ہوگیا، مسلسل بارش کے باعث ہرطرف جل تھل ایک ہو گیا، تیز بارش کی وجہ سے ندی نالوں میں طغیانی دیکھی جا رہی ہے اور سیلابی صورتحال کا خطرہ منڈلانے لگا ہے جس سے عوام میں خوف و ہراس پھیل گیا۔