دوحہ: وزیراعظم محمد شہباز شریف ایک روزہ سرکاری دورے پر قطر پہنچ گئے، جہاں ان کے ہمراہ مسلم لیگ (ن) کے صدر و سابق وزیراعظم نواز شریف سمیت اعلیٰ سطحی پاکستانی وفد بھی موجود ہے۔
دوحہ ایئرپورٹ پر قطر کے نائب وزیراعظم اور وزیرِ مملکت برائے دفاع شیخ سعود بن عبدالرحمن بن حسن بن علی آل ثانی نے وزیراعظم اور پاکستانی وفد کا استقبال کیا۔
سرکاری اعلامیے کے مطابق وزیراعظم شہباز شریف قصرِ لوسیل میں امیرِ قطر شیخ تمیم بن حمد آل ثانی سے ملاقات کریں گے۔ اس موقع پر وزیراعظم قطر کے سابق امیر مرحوم شیخ حمد بن خلیفہ آل ثانی کے انتقال پر امیرِ قطر، شاہی خاندان اور قطری عوام سے اظہارِ تعزیت کریں گے۔
وزیراعظم کے وفد میں نائب وزیراعظم و وزیرِ خارجہ اسحاق ڈار، وفاقی وزیرِ اطلاعات عطاء اللہ تارڑ اور سابق وزیراعظم نواز شریف بھی شامل ہیں۔
اگرچہ اس دورے کا بنیادی مقصد سابق امیرِ قطر کے انتقال پر تعزیت کرنا ہے، تاہم سفارتی ذرائع کے مطابق ملاقات میں پاکستان اور قطر کے درمیان دوطرفہ تعلقات، اقتصادی تعاون، سرمایہ کاری اور باہمی دلچسپی کے دیگر امور پر بھی تبادلۂ خیال متوقع ہے۔
