سرحد پار سے دہشت گردوں کا حملہ ناکام ،37ہلاک

پاک فوج نے شمالی وزیرستان میں سرحد پار سے دہشت گردوں کا بزدلانہ حملہ ناکام بناتے ہوئے 37دہشت گرد ہلاک کردیئے ۔
وفاقی وزیراطلاعات عطا اللہ تارڑ نے ایکس پر اپنی پوسٹ میں بتایا کہ 2اور 3اپریل کی رات شمالی وزیرستان کے سرحدی علاقے غلام خان سیکٹر میں سرحدی چوکی پر افغان طالبان کی جانب سے حملے کی کوشش کو مکمل طور پر ناکام بنایا گیا۔
انہوں نے کہا کہ پاک فوج نے موثر اور بروقت کارروائی کرتے ہوئے 37دہشت گردوں کو ہلاک کردیا جبکہ 80سے زائد زخمی ہو گئے ۔
وزیر اطلاعات نے مزید بتایا کہ افغانستان میں موجود دہشت گردوں کے خلاف جاری آپریشن للحق میں پانچ اپریل شام پانچ بجے تک ہلاک کیے گئے دہشت گردوں کی تعداد 796تک پہنچ گئی جب کہ 1043زخمی ہیں۔
عطا تارڑ نے مزید بتایا کہ آپریشن میں تاحال دہشت گردوں اور افغان رجیم کی 286چوکیاں تباہ ہوچکی ہیں جبکہ 44 چوکیاں قبضے میں لے لی گئیں۔
انہوں نے کہا کہ آپریشن کے دوران 249 ٹینک، بکتر بند گاڑیاں، توپیں اور ڈرون تباہ کردیے گئے، افغانستان بھر میں دہشتگردوں اور ان کے سہولت کاروں کے 81 ٹھکانوں کو موثر طور پر نشانہ بنایا گیا۔