پشاور: خیبر پختونخوا اسمبلی کے جرگہ ہال میں نوجوانوں میں پارلیمانی تعلیم، آئینی شعور، جمہوری اقدار اور موسمیاتی انصاف کے فروغ کے لیے "یوتھ پارلیمنٹ آن کلائمیٹ جسٹس” کا کامیاب انعقاد کیا گیا۔ پروگرام خیبر پختونخوا اسمبلی، یونیسف خیبر پختونخوا، محکمہ منصوبہ بندی و ترقی حکومت خیبر پختونخوا اور انسٹی ٹیوٹ آف مینجمنٹ سائنسز (آئی ایم سائنسز) پشاور کے اشتراک سے منعقد ہوا، جس میں صوبے بھر کی مختلف جامعات کے طلبہ و طالبات نے بھرپور شرکت کی۔
تقریب کے مہمانِ خصوصی اسپیکر خیبر پختونخوا اسمبلی بابر سلیم سواتی تھے، جبکہ رکن صوبائی اسمبلی اشبر جدون، سیکرٹری خیبر پختونخوا اسمبلی سید وقار شاہ، یونیسف خیبر پختونخوا کے چیف فیلڈ آفس مسٹر رادوسلاو (راڈیک) رژیہک اور آئی ایم سائنسز کے جوائنٹ ڈائریکٹر پروفیسر ڈاکٹر عطاء الرحمن بھی اس موقع پر موجود تھے۔
یوتھ پارلیمنٹ کے دوران نوجوانوں نے فرضی پارلیمانی اجلاس میں شرکت کرتے ہوئے قانون سازی اور جمہوری عمل کا عملی تجربہ حاصل کیا۔ شرکاء نے موسمیاتی تبدیلی، ماحولیاتی تحفظ اور پائیدار ترقی سے متعلق اپنے خیالات، تجاویز اور قابلِ عمل سفارشات پیش کیں۔
اجلاس میں رجسٹریشن، افتتاحی کارروائی، عمومی بحث، توجہ دلاؤ نوٹس، سوال و جواب، قراردادیں، ترامیم اور ووٹنگ سمیت پارلیمانی کارروائی کے مختلف مراحل کو عملی طور پر پیش کیا گیا، جبکہ موسمیاتی انصاف سے متعلق سفارشات کو بھی پارلیمانی طریقۂ کار کے مطابق زیرِ بحث لایا گیا۔
تقریب کے اختتام پر اسپیکر بابر سلیم سواتی نے شرکاء میں اسناد تقسیم کرتے ہوئے کہا کہ خیبر پختونخوا اسمبلی نوجوانوں میں جمہوری اقدار، آئینی شعور، قائدانہ صلاحیتوں اور موسمیاتی ذمہ داری کے فروغ کے لیے مستقبل میں بھی ایسے بامقصد پروگراموں کا انعقاد جاری رکھے گی۔ انہوں نے کہا کہ نوجوان قوم کا قیمتی اثاثہ ہیں اور انہیں پارلیمانی نظام، قانون سازی کے عمل اور قومی و صوبائی معاملات میں مؤثر کردار ادا کرنے کے مواقع فراہم کرنا وقت کی اہم ضرورت ہے۔
