آسٹریلیا نے تاریخ رقم کرتے ہوئے لیفٹیننٹ جنرل سوزن کوائل کو ملک کی پہلی خاتون آرمی چیف مقرر کر دیا ہے۔ وہ آسٹریلین ڈیفنس فورس کی کسی بھی شاخ کی قیادت کرنے والی پہلی خاتون ہیں۔
وزیر اعظم انتھونی البانیز نے پیر کے روز نئی فوجی قیادت کا اعلان کیا۔ اس کے تحت وائس ایڈمرل مارک ہیمنڈ کو چیف آف ڈیفنس فورس مقرر کیا گیا ہے، جو ایڈمرل ڈیوڈ جانسٹن کی جگہ لیں گے، جبکہ ریئر ایڈمرل میتھیو بکلی کو نیوی کا نیا سربراہ بنایا گیا ہے۔
سوزن کوائل نے 1987 میں آرمی ریزرو میں شمولیت اختیار کی تھی اور وہ مختلف اہم عسکری عہدوں پر خدمات انجام دے چکی ہیں، جن میں افغانستان ٹاسک گروپ کی کمان بھی شامل ہے۔
وزیر دفاع رچرڈ مارلز نے اس تقرری کو خواتین کے لیے ایک اہم سنگ میل قرار دیا ہے۔ ان کا کہنا تھا کہ اس سے نہ صرف فوج میں خدمات انجام دینے والی خواتین کی حوصلہ افزائی ہوگی بلکہ مستقبل میں مزید خواتین کو بھی اس شعبے میں آنے کا موقع ملے گا۔
یہ تقرریاں جولائی 2026 سے نافذ العمل ہوں گی۔
