امریکی صدر ڈونلڈ ٹرمپ نے دعویٰ کیا ہے کہ آبنائے ہرمز میں ایک ایرانی مال بردار جہاز “ٹوسکا” کو امریکی بحریہ نے اپنی تحویل میں لے لیا ہے۔
سماجی رابطے کی ویب سائٹ ٹرتھ سوشل پر جاری اپنے بیان میں ڈونلڈ ٹرمپ نے کہا کہ مذکورہ جہاز، جس کی لمبائی تقریباً 900 فٹ بتائی جا رہی ہے، نے امریکی بحری ناکہ بندی عبور کرنے کی کوشش کی تاہم اسے روک لیا گیا۔
امریکی صدر کے مطابق USS Spruance نامی گائیڈڈ میزائل ڈسٹرائر نے خلیجِ عمان میں جہاز کو روکا اور اسے رکنے کے لیے انتباہ جاری کیا، تاہم ایرانی عملے نے ہدایات پر عمل نہیں کیا۔
انہوں نے دعویٰ کیا کہ امریکی بحری جہاز نے کارروائی کرتے ہوئے ٹوسکا کے انجن روم کو نشانہ بنایا جس کے نتیجے میں جہاز کو وہیں روک لیا گیا اور بعد ازاں امریکی میرینز نے اسے اپنی تحویل میں لے لیا۔
ڈونلڈ ٹرمپ نے مزید کہا کہ مذکورہ جہاز ماضی میں غیر قانونی سرگرمیوں کے باعث امریکی محکمہ خزانہ کی پابندیوں کی فہرست میں شامل رہا ہے، اور اس وقت جہاز میں موجود سامان کا تفصیلی جائزہ لیا جا رہا ہے۔
تاہم اس حوالے سے ایرانی حکام کی جانب سے تاحال کوئی باضابطہ ردعمل سامنے نہیں آیا ہے۔
