پشاور( سپیشل رپورٹر) الیکشن کمیشن آف پاکستان نے خیبر پختونخوا میں بلدیاتی انتخابات کے انعقاد سے متعلق اہم فیصلہ سناتے ہوئے حلقہ بندیاں مکمل ہونے والے اضلاع میں انتخابات کا عمل فوری آگے بڑھانے اور انتخابی شیڈول منظوری کیلئے پیش کرنے کی ہدایت کردی ہے جبکہ ہنگامی انتظامات کے تحت آنے والے 12اضلاع کو فی الحال انتخابی عمل سے مستثنیٰ رکھا گیا ہے
چیف الیکشن کمشنر سکندر سلطان راجہ کی سربراہی میں 5رکنی بینچ نے بدھ کے روزکو محفوظ فیصلہ سنایا کمیشن نے جن اضلاع میں حلقہ بندیاں مکمل نہیں ہوئیں وہاں حلقہ بندیوں کا شیڈول جاری کرنے کی بھی ہدایت کی ہے
الیکشن کمیشن کا یہ فیصلہ ایسے وقت میں سامنے آیا ہے جب خیبر پختونخوا میں منتخب بلدیاتی اداروں کی مدت ختم ہونے کے باوجود نئے انتخابات نہیں ہوسکے صوبائی حکومت نے امن و امان کی صورت حال، ہنگامی حالت کے نفاذ اور بعض علاقوں میں فوج کی تعیناتی کا حوالہ دیتے ہوئے 12اضلاع میں انتخابات ملتوی کرنے کی درخواست کی تھی
تاہم کمیشن نے واضح کیا کہ جہاں حلقہ بندیوں سمیت ضروری انتخابی مراحل مکمل ہوچکے ہیں وہاں انتخابات کا عمل مزید تاخیر کا شکار نہیں ہونا چاہئے
فیصلے کے مطابق صوبے کے 23اضلاع میں حلقہ بندیوں کا عمل مکمل ہونے کی اطلاع دی گئی تھی تاہم متعلقہ ہنگامی انتظامات کے باعث 12اضلاع کو الگ رکھا گیا ہے کمیشن نے بنوں، لکی مروت، مہمند، اورکزئی اور شمالی وزیرستان میں موجودہ انتظامی فیصلے کے تحت انتخابات نہ کرانے کی ہدایت کی جبکہ ڈیرہ اسماعیل خان، ٹانک، باجوڑ، خیبر، کرم، بالائی جنوبی وزیرستان اور زیریں جنوبی وزیرستان میں حلقہ بندیوں کا شیڈول جاری نہ کرنے کا حکم دیا ہے
الیکشن کمیشن نے متعلقہ انتخابی حکام کو ہدایت کی ہے کہ باقی اضلاع میں انتخابی پروگرام مرتب کرکے منظوری کیلئے پیش کیا جائے جبکہ جہاں حلقہ بندیاں مکمل نہیں ہوئیں وہاں ضروری قانونی اور انتظامی کارروائی مکمل کی جائے اس فیصلے سے صوبے میں بلدیاتی انتخابات کے انعقاد کی راہ کھل گئی ہے،
تاہم پولنگ کی حتمی تاریخیں ابھی انتخابی شیڈول جاری ہونے کے بعد ہی واضح ہوں گی واضح رہے کہ خیبر پختونخوا میں آخری عام بلدیاتی انتخابات 2مرحلوں میں منعقد ہوئے تھے پ
ہلے مرحلے میں 17ضلاع میں پولنگ 19دسمبر 2021کو ہوئی جبکہ دوسرے مرحلے کے انتخابات 31مارچ 2022 کو منعقد کئے گئے
دوسرے مرحلے کی ابتدائی تاریخ میں تبدیلی کے بعد الیکشن کمیشن نے 31مارچ کو پولنگ کرائی تھی پہلے مرحلے میں منتخب ہونے والےبلدیاتی اداروں کی مدت مارچ 2026میں ختم ہوئی جبکہ دوسرے مرحلے میں منتخب نمائندوں کی مدت جون 2026میں پوری ہوگئی تھی
اس طرح صوبے میں منتخب بلدیاتی حکومتوں کی مدت مکمل ہونے کے بعد نئے انتخابات کا معاملہ مسلسل تاخیر کا شکار رہا اب الیکشن کمیشن کے تازہ فیصلے کے بعد بلدیاتی انتخابات کیلئے انتخابی شیڈول، حلقہ بندیوں اور انتظامی تیاریوں کا مرحلہ اہمیت اختیار کرگیا ہے۔