آل پاکستان پٹرول پمپس اونرز ایسوسی ایشن نے وزارتِ پیٹرولیم کے ساتھ مذاکرات ناکام ہونے کے بعد آج رات 12 بجے سے ملک بھر میں غیر معینہ مدت کے لیے پیٹرول پمپ بند کرنے کا اعلان کر دیا۔
ایسوسی ایشن کے جنرل سیکرٹری نعمان علی بٹ نے کہا کہ حکومت کی جانب سے پیٹرولیم مصنوعات کی قیمتوں میں روزانہ کی بنیاد پر تبدیلی کا مجوزہ نظام ڈیلرز کے لیے ناقابلِ قبول ہے، اس لیے احتجاجاً ہڑتال کا فیصلہ کیا گیا ہے۔ انہوں نے مطالبہ کیا کہ حکومت ڈیلی پرائسنگ میکانزم پر نظرثانی کرے اور ڈیلرز کے تحفظات دور کرنے کے لیے سنجیدہ مذاکرات کرے۔
دوسری جانب حکومت کا مؤقف ہے کہ روزانہ قیمتوں کا نظام بین الاقوامی مارکیٹ کے مطابق شفافیت بڑھانے اور قیمتوں میں بروقت ردوبدل کو یقینی بنانے کے لیے متعارف کرایا جا رہا ہے۔
