بیٹے پشاور کے نواحی علاقہ سنگو کلے میں بیٹے نے مبینہ طور پر فائرنگ کرکے والدین اور بھائی کو قتل کر دیا
پشاور کے نواحی علاقے سنگو کلے میں گھریلو تنازع ایک خوفناک سانحے میں تبدیل ہوگیا، جہاں ایک شخص نے مبینہ طور پر فائرنگ کرکے اپنے والد، والدہ اور بھائی کو قتل کر دیا۔
پولیس کے مطابق افسوسناک واقعہ تھانہ سربند کی حدود سنگو کلے میں پیش آیا، جہاں امجد نامی شخص نے مبینہ طور پر اپنے والد جانس، والدہ اور بھائی ریاض پر اندھا دھند فائرنگ کر دی، جس کے نتیجے میں تینوں موقع پر ہی جاں بحق ہوگئے۔
واقعے کی اطلاع ملتے ہی پولیس کی بھاری نفری جائے وقوعہ پر پہنچ گئی، علاقے کو گھیرے میں لے کر شواہد اکٹھے کیے اور لاشوں کو پوسٹ مارٹم اور دیگر قانونی کارروائی کے لیے اسپتال منتقل کر دیا۔
پولیس کا کہنا ہے کہ ملزم واردات کے بعد موقع سے فرار ہونے میں کامیاب ہوگیا، تاہم اس کی گرفتاری کے لیے مختلف مقامات پر چھاپے مارے جا رہے ہیں۔
پولیس کے مطابق قتل کی اصل وجوہات اور دیگر حقائق تحقیقات مکمل ہونے کے بعد سامنے آئیں گے۔ واقعے کا مقدمہ درج کر لیا گیا ہے اور مزید قانونی کارروائی جاری ہے۔
