وزیر اعلیٰ خیبرپختونخوا محمد سہیل آفریدی نے19 اپریل کو صوبے میں ایک عظیم الشان عوامی جلسہ منعقد کرنے کا اعلان کرتے ہوئے کہا ہے کہ ضلع مردان میں منعقد ہونے والا پاکستان تحریک انصاف کا یہ جلسہ ملکی سیاست کا ایک تاریخی اور فیصلہ کن اجتماع ثابت ہوگا جس کے ذریعے پوری دنیا کو یہ پیغام دیا جائے گا کہ تمام تر سیاسی انتقام، قید و بند اور ریاستی دباؤ کے باوجود پاکستان تحریک انصاف آج بھی ملک کی سب سے بڑی اور مقبول ترین سیاسی جماعت ہے۔ انہوں نے کہا کہ سابق وزیر اعظم عمران خان کی ہدایت پر منعقد ہونے والا یہ جلسہ اس امر کا بھی واضح ثبوت ہوگا کہ عمران خان آج بھی عوام کے مقبول ترین رہنما اور قوم کے دلوں کی دھڑکن ہیں۔ اپنے ویڈیو پیغام میں وزیر اعلیٰ نے کہا کہ عمران خان اور ان کی اہلیہ بشریٰ بی بی کو ناحق قید میں رکھا گیا ہے جبکہ گزشتہ کئی برسوں سے پاکستان تحریک انصاف کی قیادت کے خلاف مسلسل ظلم، جبر اور سیاسی انتقام کا سلسلہ جاری ہے، تاہم ان تمام ہتھکنڈوں کے باوجود نہ تو عمران خان کے بیانیے کو دبایا جا سکا اور نہ ہی عوام کی محبت کو کم کیا جا سکا۔ انہوں نے کہا کہ 19 اپریل کا جلسہ دنیا کو یہ دکھائے گا کہ عمران خان جیل میں ہونے کے باوجود ملک میں بڑی سیاسی سرگرمی متحرک کرنے کی صلاحیت رکھتے ہیں اور ان کی عوامی مقبولیت آج بھی ناقابلِ تسخیر ہے۔ وزیر اعلیٰ نے کہا کہ جلسے کے اعلان کے بعد مخالفین خصوصاً بعض ڈیجیٹل پلیٹ فارمز سے وابستہ عناصر منفی پروپیگنڈے کے ذریعے اس جلسے کو ناکام بنانے کی کوشش کر رہے ہیں، تاہم کارکنان ایسے ہتھکنڈوں سے مرعوب ہونے کے بجائے عمران خان کی ہدایات کو مدنظر رکھتے ہوئے اپنی سیاسی جدوجہد جاری رکھیں گے۔ انہوں نے کہا کہ عمران خان جب بھی کسی سیاسی سرگرمی کی ہدایت دیتے ہیں تو اس کے پیچھے ایک واضح حکمت عملی اور مقصد ہوتا ہے، لہٰذا کارکنان اور عوام کی ذمہ داری ہے کہ وہ اس مقصد کو کامیاب بنائیں۔ انہوں نے کہا کہ پاکستان تحریک انصاف اس جلسے کو پاکستان کی تاریخ کے بڑے عوامی اجتماعات میں تبدیل کرے گی اور عمران خان کی غیر موجودگی میں انہیں یہ واضح پیغام دیا جائے گا کہ پاکستانی قوم آج بھی ان کے ساتھ کھڑی ہے، پہلے بھی کھڑی تھی اور آئندہ بھی کھڑی رہے گی۔ وزیر اعلیٰ نے تمام پاکستانیوں سے اپیل کی کہ وہ 19 اپریل کو سہ پہر 3 بجے مردان ریلوے گراونڈ میں منعقد ہونے والے جلسے میں بھرپور شرکت کر کے اپنی سیاسی وابستگی اور عوامی قوت کا بھرپور مظاہرہ کریں۔
<><><><><><><>
