جامعہ پشاور میں تنخواہوں اور پنشن کی عدم ادائیگی پر ملازمین کی ہڑتال، تعلیمی سرگرمیاں متاثر ہونے کا خدشہ

جامعہ پشاور میں تنخواہوں اور پنشن کی عدم ادائیگی پر ملازمین کی ہڑتال، تعلیمی سرگرمیاں متاثر ہونے کا خدشہ
پشاور: جامعہ پشاور کے ملازمین نے تنخواہوں اور پنشن کی عدم ادائیگی کے خلاف بھرپور ہڑتال شروع کر دی، جس کے باعث جامعہ کے معمولات شدید متاثر ہونے کا خدشہ پیدا ہو گیا ہے۔آج بروز منگل یونیورسٹی کے مختلف شعبوں سے تعلق رکھنے والے ملازمین کی بڑی تعداد وائس چانسلر کے دفتر کے باہر جمع ہو گئی، جہاں انہوں نے اپنے مطالبات کے حق میں احتجاجی مظاہرہ کیا۔ مظاہرین نے واضح کیا کہ وہ کافی عرصے سے تنخواہوں اور پنشن کی عدم ادائیگی جیسے سنگین مسئلے کا سامنا کر رہے ہیں، جس کے باعث ان کے گھریلو معاملات شدید متاثر ہو رہے ہیں۔احتجاج کے دوران ملازمین نے یونیورسٹی کے دیگر داخلی راستے اور گیٹس بند کرنے کا اعلان بھی کیا
مظاہرین سے خطاب کرتے ہوئے مقررین نے کہا کہ یہ احتجاج صرف تنخواہوں کے حصول کے لیے نہیں بلکہ پوری کمیونٹی کے حقوق کے تحفظ کے لیے کیا جا رہا ہے۔ ان کا کہنا تھا کہ اگر آج وہ خاموش رہے تو مستقبل میں مسائل مزید بڑھ جائیں گے۔ مقررین نے اس بات پر بھی زور دیا کہ وہ انتظامیہ کے ساتھ احترام کے دائرے میں رہتے ہوئے مسائل حل کرنا چاہتے ہیں، تاہم اگر ان کے جائز مطالبات پورے نہ کیے گئے تو وہ کام کرنے سے انکار کرنے پر مجبور ہوں گے،ملازمین نے مطالبہ کیا ہے کہ ان کی تنخواہیں اور پنشن فوری طور پر جاری کی جائیں اور آئندہ کے لیے ادائیگیوں کا باقاعدہ نظام وضع کیا جائے تاکہ اس قسم کی صورتحال دوبارہ پیدا نہ ہو