صوبائی دارالحکومت پشاور میں حوالہ ہنڈی کےخلاف کریک ڈاون کرتے ہوئے ایف آئی اے نے کروڑوں کی نقدی سمیت دو ملزمان گرفتار کر لئے۔
پشاور صدر میں وفاقی تحقیقاتی ادارے (ایف آئی اے) نے حوالہ ہنڈی کے غیر قانونی کاروبار کے خلاف کارروائی کرتے ہوئے دو ملزمان کو گرفتار کر لیا، جن کے قبضے سے 3 کروڑ روپے پاکستانی کرنسی برآمد ہوئی ہے۔
ترجمان ایف آئی اے پشاور زون کے مطابق ایف آئی اے کمرشل بینکنگ سرکل پشاور نے گزشتہ 24 گھنٹوں کے دوران پشاور صدر میں چھاپہ مار کارروائی کی، اس دوران حوالہ ہنڈی کے غیر قانونی کاروبار میں مبینہ طور پر ملوث دو افراد دوست محمد ولد اول گل اور نذیر میر ولد محمد امیر کو گرفتار کیا گیا۔
ایف آئی اے حکام کے مطابق کارروائی کے دوران گرفتار ملزمان کے قبضے سے 3 کروڑ روپے پاکستانی کرنسی کے علاوہ حوالہ ہنڈی کے غیر قانونی کاروبار سے متعلق دیگر شواہد بھی برآمد کیے گئے۔
حوالہ ہنڈی کےخلاف کریک ڈاون کے حوالے سے ابتدائی تحقیقات میں بتایا گیا ہے کہ ملزمان مبینہ طور پر کسی قانونی لائسنس یا اجازت نامے کے بغیر حوالہ ہنڈی کا کاروبار چلا رہے تھے، گرفتار ملزمان کے خلاف مقدمہ درج کر لیا گیا ، جبکہ واقعے کے مزید پہلوؤں کا تعین کرنے کے لیے تفتیش جاری ہے۔