نادرا افسر فہد خان قتل کیس میں اہم پیشرفت، چار مبینہ حملہ آوروں کی شناخت، مرکزی ملزم کا بھی سراغ مل گیا
دو موٹر سائیکلوں پر سوار چار ملزمان واردات میں ملوث، ملزمان کی گرفتاری کے لیے خصوصی ٹیموں کے چھاپے، بیرون ملک فرار روکنے کے لیے ایئرپورٹس اور سرحدی راستوں پر الرٹ جاری
پشاور (نامہ نگار) صوبائی دارالحکومت پشاور میں نادرا افسر فہد خان کے قتل کیس میں اہم پیشرفت سامنے آئی ہے، پولیس نے واردات میں ملوث چار مبینہ حملہ آوروں کی شناخت کرلی ہے، جبکہ مرکزی ملزم کا بھی سراغ لگا لیا گیا ہے۔ ملزمان کی گرفتاری کے لیے خصوصی پولیس ٹیموں نے مختلف مقامات پر چھاپے شروع کر دیے ہیں۔
پولیس ذرائع کے مطابق تحقیقاتی ٹیموں نے جائے وقوعہ تک ملزمان کی آمد، علاقے میں نقل و حرکت اور واردات کے بعد فرار ہونے کے راستوں کا سراغ لگا لیا ہے۔ ابتدائی تحقیقات اور سی سی ٹی وی فوٹیج کے جائزے سے معلوم ہوا ہے کہ واردات میں دو موٹر سائیکلوں پر سوار چار ملزمان ملوث تھے، جنہوں نے حملے سے قبل متعدد مرتبہ علاقے کی ریکی بھی کی تھی۔
ذرائع کے مطابق حملہ آوروں نے مقتول فہد خان کی نقل و حرکت اور معمولات کا جائزہ لینے کے بعد انہیں یونیورسٹی ٹاؤن سے دفتر جاتے ہوئے تعاقب کے بعد نشانہ بنایا۔ پولیس ذرائع کا کہنا ہے کہ مقتول عموماً بلٹ پروف گاڑی اور ذاتی گارڈز کے ہمراہ دفتر آیا کرتے تھے، تاہم واردات کے روز ان کا اکیلے دفتر آنا حملہ آوروں کے لیے موقع بن گیا۔
پولیس ذرائع کے مطابق چاروں مبینہ ملزمان کی شناخت کے بعد ان کے شناختی کارڈ بلاک کر دیے گئے ہیں، جبکہ ممکنہ طور پر بیرون ملک فرار ہونے کی کوشش ناکام بنانے کے لیے ایئرپورٹس اور سرحدی راستوں پر بھی الرٹ جاری کر دیا گیا ہے۔
ابتدائی تفتیش میں قتل کی واردات کو دیرینہ خاندانی دشمنی کا شاخسانہ قرار دیا جا رہا ہے، تاہم پولیس حکام کی جانب سے کیس کے دیگر پہلوؤں کا بھی جائزہ لیا جا رہا ہے۔ ملزمان کی گرفتاری کے لیے خصوصی ٹیموں کی کارروائیاں جاری ہیں اور پولیس کو توقع ہے کہ مزید پیشرفت جلد سامنے آئے گی۔