پشاور (ویب ڈیسک) خیبرپختونخوا میں حالیہ وقفے وقفے سے ہونے والی بارشوں کے باعث پیسکو ریجن میں بجلی کا نظام بری طرح متاثر ہو گیا جہاں 100 سے زائد فیڈرز ٹرپ کر گئے ، تاہم پیسکو حکام کے مطابق گزشتہ روز سے اب تک 110 فیڈرز پر بجلی بحال کر دی گئی تھی مگر دوبارہ بارش کے باعث مزید 65 فیڈرز ایک بار پھر بند ہو گئے ہیں۔ ترجمان پیسکو کے مطابق فیلڈ سٹاف دن رات خراب موسم کے باوجود بجلی کی بحالی کے لیے سرگرم عمل ہے جبکہ جن علاقوں میں ممکن تھا وہاں متبادل روٹس کے ذریعے بجلی کی فراہمی یقینی بنائی گئی ہے۔ پیسکو چیف اختر حمید خان آپریشن ٹیموں کے ساتھ مسلسل رابطے میں ہیں اور جلد از جلد بجلی بحال کرنے کی ہدایات جاری کر رہے ہیں، اس سلسلے میں فیلڈ ٹیموں کو اضافی ٹرانسفارمرز، تاریں اور دیگر ضروری آلات بھی فراہم کیے گئے ہیں۔ حکام کا کہنا ہے کہ بیشتر فیڈرز پر بجلی معمول کے مطابق فراہم کی جا رہی ہے جبکہ عملے کو سختی سے حفاظتی تدابیر اختیار کرنے اور سیفٹی کٹس کے استعمال کی ہدایت بھی دی گئی ہے۔ ترجمان نے صارفین سے اپیل کی ہے کہ بجلی بندش کی صورت میں 118 پر اطلاع دیں تاکہ فوری کارروائی ممکن بنائی جا سکے
