پشاور(نیوزرپورٹر)نیشنل جاب پورٹل پر سرکاری ملازمتوں کے حصول کیلئے امیدواروں کی غیر معمولی دلچسپی سامنے آئی ہے مختلف سرکاری اداروں کی 1200 سے زائد آسامیوں کیلئے اب تک 15 لاکھ سے زائد آن لائن درخواستیں موصول ہوچکی ہیں۔
سرکاری اعداد و شمار کے مطابق نیشنل جاب پورٹل پر اب تک 2 کروڑ 75 لاکھ سے زائد منفرد صارفین وزٹ کرچکے ہیں جبکہ 15 لاکھ 62 ہزار سے زائد امیدواروں نے اپنے اکاونٹس اور سی وی رجسٹر کرائے ہیں۔
اعداد و شمار کے مطابق پورٹل پر اب تک سرکاری اداروں کی 1200 سے زائد ملازمتوں کے اشتہارات جاری کیے جاچکے ہیں، جن میں مجموعی طور پر 22 ہزار 999 خالی آسامیوں کا ریکارڈ پورٹل کے آرکائیو کا حصہ بن چکا ہے۔
اس وقت 185 سرکاری ادارے اور آجر نیشنل جاب پورٹل پر رجسٹرڈ ہیں، جو اپنی خالی آسامیوں کی تشہیر اور بھرتی کے عمل کیلئے اس ڈیجیٹل پلیٹ فارم سے استفادہ کر رہے ہیں۔
نیشنل جاب پورٹل نیشنل انفارمیشن ٹیکنالوجی بورڈ کی جانب سے تیار کردہ وفاقی حکومت کا ڈیجیٹل اقدام ہے، جس کا مقصد وفاقی وزارتوں اور سرکاری اداروں میں دستیاب ملازمتوں کو ایک ہی پلیٹ فارم پر لانا اور بھرتی کے عمل میں شفافیت کو فروغ دینا ہے۔
پورٹل کے ذریعے سرکاری ادارے اپنی خالی آسامیوں کے اشتہارات آن لائن جاری کرتے ہیں جبکہ امیدوار گھر بیٹھے مختلف وزارتوں اور محکموں میں دستیاب ملازمتوں کیلئے درخواستیں جمع کراسکتے ہیں، جس سے روایتی کاغذی کارروائی اور دفاتر کے چکروں میں بھی کمی لائی گئی ہے۔
