خیبرپختونخوا میں بارشوں سے تباہی، 10بچوں سمیت 12افراد جاں بحق، 47زخمی

صوبائی دارالحکومت پشاور سمیت صوبہ بھر میں بارشوں سے موسم سرد ہو گیا ہے تاہم بارشوں سے جانی و مالی نقصانات کے حوالے سے پی ڈی ایم اے نے رپورٹ جاری کر دی ہے، جس میں بتایا گیاہے کہ خیبرپختونخوا میں بارشوں سے تباہی پھیل گئی ہے، جہاں 10بچوں سمیت 12افراد جاں بحق جبکہ 47زخمی ہوئے ہیں جبکہ اس سے متعدد مکانات کے منہدم ہونے یا جزوی نقصان پہنچنے کا بھی کہا گیا ہے۔
پی ڈی ایم اے کی جانب سے 25 مارچ سے اب تک ہونے والی بارشوں کے باعث صوبہ کے مختلف اضلاع میں جانی و مالی نقصانات کی ابتدئی رپورٹ میں بتایا گیا ہے کہ بارشوں کے باعث گھروں کی چھتیں اور دیواریں گرنے سے اب تک 9 افراد جاں بحق جبکہ 47 افراد زخمی ہوئے، ان جاں بحق ہونے والے افراد میں 8 بچے اور ایک خاتون جبکہ زخمیوں میں 26 مرد اور 21 بچے شامل ہیں۔
خیبرپختونخوا میں بارشوں سے تباہی کے حوالے سے جاری رپورٹ میں بتایا گیاہے کہ بارشوں کے باعث مجموعی طور پر 6 گھر وں کو جزوی نقصان پہنچا، یہ حادثات صوبہ کے دو اضلاع بنوں اور شمالی وزیرستان میں پیش آئے، پی ڈی ایم اے، ریسکیو 1122، ضلعی انتظامیہ اور متعلقہ اداراے آپس میں رابطے میں ہیں اور امدادی سرگرمیاں جاری رکھے ہوئے ہیں، پی ڈی ایم اے کی جانب سے متاثرہ اضلاع کی انتظامیہ کو متاثرین کو جلد امدادی سامان فراہم کرنے کی ہدایت دیدی گئی ہے۔
صوبہ کے مختلف اضلاع میں بارشوں کا سلسلہ وقفے وقفے سے جاری ہے جبکہ یہ سلسلہ منگل کے روز تک جاری رہنے کا امکان ہے، اس دوران عوام سےاپیل کی گئی ہے کہ بلاوجہ سفر سے گریز کریں اور حساس سیاحتی مقامات کا رخ نہ کریں اور حکومتی اداروں کی جانب سے الرٹس اور ایڈوائزری پر عمل کریں