کوہاٹ پولیس لائنز میں مسجد کے قریب خودکش حملے اور دہشتگردوں کی دراندازی کے واقعے کا مقدمہ نامعلوم دہشتگردوں کے خلاف تھانہ سی ٹی ڈی میں درج کرلیا گیا۔
پولیس کے مطابق ایف آئی آر میں دہشتگردی، قتل، اقدام قتل سمیت دیگر دفعات شامل کی گئی ہیں۔
ایف آئی آر کے متن کے مطابق دہشتگردوں نے مسجد پر بارود سے بھری گاڑی کے ذریعے خودکش حملہ کیا، جس کے بعد مسجد کے راستے کو پولیس لائنز میں داخلے کے لیے استعمال کیا گیا۔
واضح رہے کہ گزشتہ روز پرانی پولیس لائنز کی مسجد کے قریب خودکش حملے کے بعد دہشتگرد پولیس لائنز میں داخل ہوگئے تھے، جس کے نتیجے میں پولیس اور سکیورٹی فورسز کے ساتھ طویل فائرنگ کا تبادلہ ہوا۔
حملے میں 23 افراد جاں بحق جبکہ 100 سے زائد زخمی ہوئے تھے۔
پولیس کے مطابق خودکش حملے اور دہشتگردوں کی دراندازی کے بعد جوابی کارروائی میں مجموعی طور پر 8 دہشتگرد ہلاک ہوئے، جبکہ ایلیٹ فورس کمانڈوز، سی ٹی ڈی ٹیموں اور سکیورٹی فورسز نے پولیس لائنز کی اہم عمارات کو کلیئر کرلیا۔
