پشاور میں شہریوں کی صحت سے کھیلنے والوں کے خلاف بڑا کریک ڈاؤن سامنے آیا ہے، جہاں ضلعی انتظامیہ نے چرگانوچوک کے علاقے میں کارروائی کرتے ہوئے مردار مرغیوں کے کاروبار میں ملوث ایک دکاندار کو گرفتار کر لیا۔
سرکاری ذرائع کے مطابق یہ کارروائی خفیہ اطلاع موصول ہونے کے بعد کی گئی، جس میں انکشاف ہوا تھا کہ ایک مخصوص دکان سے غیر معیاری اور مردار مرغیاں شہر کے مختلف علاقوں میں سپلائی کی جا رہی ہیں۔ اطلاع پر فوری ایکشن لیتے ہوئے انتظامیہ اور فوڈ سیفٹی ٹیموں نے مشترکہ چھاپہ مارا، جہاں سے بڑی مقدار میں مردار اور بدبودار مرغیاں برآمد ہوئیں۔
حکام کا کہنا ہے کہ ابتدائی تحقیقات کے دوران یہ بات سامنے آئی ہے کہ یہ مضر صحت گوشت پشاور کے مختلف شوارما پوائنٹس، برگر شاپس اور چھوٹے ہوٹلوں کو فراہم کیا جاتا تھا، جس سے شہریوں کی صحت کو شدید خطرات لاحق تھے۔ کارروائی کے دوران برآمد ہونے والی تمام مرغیوں کو موقع پر ہی تلف کر دیا گیا تاکہ انہیں مزید استعمال میں نہ لایا جا سکے۔
انتظامیہ نے دکاندار کو موقع سے گرفتار کر کے اس کے خلاف فوڈ سیفٹی قوانین کے تحت مقدمہ درج کر لیا ہے، جبکہ اس نیٹ ورک سے جڑے دیگر افراد کی تلاش بھی شروع کر دی گئی ہے۔ حکام کے مطابق اس مکروہ کاروبار میں ملوث عناصر کے خلاف بلا امتیاز کارروائیاں جاری رہیں گی۔
