فکرِ اقبال نوجوان نسل کے لیے خودی، خود اعتمادی اور مسلسل جدوجہد کا پیغام ہے، گورنر خیبرپختونخوا
فیصل کریم کنڈی کا یومِ اقبال پر شاعرِ مشرق علامہ محمد اقبال کو خراجِ عقیدت، فکرِ اقبال کو قومی رہنمائی کا مؤثر ذریعہ قرار دے دیا
پشاور (نامہ نگار) گورنر خیبرپختونخوا فیصل کریم کنڈی نے یومِ اقبال کے موقع پر شاعرِ مشرق، مفکرِ پاکستان علامہ محمد اقبال کو شاندار خراجِ عقیدت پیش کرتے ہوئے کہا ہے کہ فکرِ اقبال نوجوان نسل کے لیے خودی، خود اعتمادی، اتحاد، علم اور مسلسل جدوجہد کا اہم پیغام ہے۔
اپنے خصوصی پیغام میں گورنر فیصل کریم کنڈی نے کہا کہ علامہ محمد اقبال کا تصورِ پاکستان ایک آزاد، خودمختار اور باوقار ریاست کی فکری بنیاد بنا۔ ان کا فلسفہ خودی نوجوان نسل کو خود اعتمادی، بلند حوصلے، علم کے حصول اور زندگی کے ہر میدان میں مسلسل جدوجہد کا درس دیتا ہے۔
انہوں نے کہا کہ فکرِ اقبال آج بھی قومی رہنمائی کا ایک مؤثر ذریعہ ہے اور ان کے افکار پر عمل پیرا ہو کر نوجوان نسل ملک و قوم کی ترقی اور خوشحالی میں اہم کردار ادا کر سکتی ہے۔
گورنر خیبرپختونخوا نے مزید کہا کہ یومِ اقبال ہمیں اتحاد، خودداری، قومی یکجہتی اور قیامِ پاکستان کے بنیادی مقاصد سے تجدیدِ عہد کا موقع فراہم کرتا ہے۔ ہمیں علامہ اقبال کے پیغام کو اپنی انفرادی اور اجتماعی زندگیوں میں اپناتے ہوئے ایک مضبوط، متحد اور ترقی یافتہ پاکستان کی تعمیر کے لیے اپنا کردار ادا کرنا چاہیے۔