وزیراعلی خیبرپختونخوا محمد سہیل آفریدی نے ہنگو کے ابوبکر صدیق چوک میں سٹریٹ موومنٹ کے شرکا سے خطاب کرتے ہوئے 27 اگست کو اسلام آباد لانگ مارچ کا اعلان کر دیا۔
انہون نے عمران خان کے علاج سے متعلق عدالتی فیصلے پر عملدرآمد نہ ہونے پر حکومت اور انتظامیہ کو شدید تنقید کا نشانہ بنایا، اور الزام عائد کیا کہ عمران خان کے علاج سے متعلق تین ججز کے فیصلے کو حکومت اور انتظامیہ نے نظر انداز کرکے عدلیہ کی توہین کی ہے۔
ان کے مطابق عدالتوں نے عمران خان کے علاج کے لیے دو دن کا وقت دیا تھا، تاہم فیصلے پر عملدرآمد نہیں کیا گیا۔
وزیراعلی خیبرپختونخوا نے کہا کہ ایک مرتبہ پھر ملک کے ان ٹچیبل افراد نے ثابت کیا ہے کہ وہ آئین اور قانون سے بالاتر ہیں۔
انہوں نے کہا کہ اگر ان کے خلاف عدالت، ایف آئی اے یا کسی دوسرے ادارے کی جانب سے حکم جاری ہو تو فوری عملدرآمد ہوجاتا ہے، لیکن طاقتور افراد کے معاملے میں عدالتی فیصلوں پر عمل نہیں کیا جاتا۔
سہیل آفریدی کا کہنا تھا کہ ملک میں کمزور اور طاقتور کے لیے الگ الگ قانون نہیں ہوسکتا۔ اگر عدالتیں طاقتور افراد کو قانون کے کٹہرے میں نہیں لاسکتیں تو پھر کمزور اور مظلوم افراد کو سزا دینے کا بھی کوئی جواز نہیں۔
وزیراعلی نے کہا کہ عمران خان نے حقیقی آزادی کی جو جدوجہد شروع کی ہے، اس کا مقصد کمزور اور طاقتور کے لیے ایک ہی قانون کا نفاذ ہے۔
انہوں نے عدلیہ سے سوال کیا کہ موجودہ حالات میں ملک کو کس سمت لے جایا جا رہا ہے، ان کے مطابق کسان پریشان ہے جبکہ صنعتکار اپنا سرمایہ ملک سے باہر منتقل کر رہا ہے۔
سہیل آفریدی نے کہا کہ اگر طاقتور لوگوں کو تحفظ دینے کا فیصلہ کیا گیا ہے تو وہ اس فیصلے کے خلاف ہیں۔
وزیراعلی خیبرپختونخوا نے پی ٹی آئی خواتین کے خلاف مبینہ ظلم و جبر کا بھی ذکر کیا اور عمران خان کی بہنوں کے ساتھ ہونے والے سلوک پر تنقید کی۔
انہوں نے کہا کہ پی ٹی آئی کارکنان عمران خان کے ساتھ کھڑے ہیں اور ان کی بہنوں کے ساتھ پیش آنے والے واقعات کو بھی نظر انداز نہیں کیا جائے گا۔
سہیل آفریدی نے خطاب کے دوران اعلان کیا کہ 27 اگست کو اسلام آباد لانگ مارچ کیا جائے گا۔ ان کا کہنا تھا کہ اس مرتبہ 20 لاکھ نہیں بلکہ 40 لاکھ افراد کو اسلام آباد لے جانے کا ہدف ہے۔
وزیراعلی خیبرپختونخوا سہیل آفریدی سٹریٹ موومنٹ کے سلسلے میں ہنگو پہنچے، جہاں کارکنوں اور مقامی رہنماں نے ان کا استقبال کیا۔ ان کے ہمراہ شفیع جان اور مینا خان آفریدی بھی موجود تھے، وزیراعلی نے سٹریٹ موومنٹ کے دوران ہنگو بازار کا دورہ بھی کیا۔
