عدالتیں یرغمال، مقبول ترین لیڈر جیل میں، عوام کو نکلنا ہوگا: وزیراعلیٰ سہیل آفریدی

وزیراعلیٰ خیبرپختونخوا محمد سہیل آفریدی نے کہا ہے کہ 27ستمبر کو فیصلہ کن مارچ ہوگا، عوام اپنے حقوق کے لیے گھروں سے نکلیں اور اپنے مستقبل کا فیصلہ خود کریں۔
بنوں میں اسٹریٹ موومنٹ ریلی کے اختتامی اجتماع سے خطاب کرتے ہوئے وزیراعلیٰ نے شدید گرمی کے باوجود بڑی تعداد میں شرکت پر بنوں کے عوام کا شکریہ ادا کیا اور کہا کہ عوام کا یہ جوش و جذبہ برقرار رہنا چاہیے۔
محمد سہیل آفریدی نے کہا کہ 2018سے 2022تک جب فیصلے عوامی مفاد میں کیے جاتے تھے تو ملک میں امن اور خوشحالی تھی، تاہم آج عدالتیں بھی یرغمال ہیں اور مقبول ترین لیڈر ناحق جیل میں ہے، تو عام آدمی کی کیا حیثیت رہ جاتی ہے۔
انہوں نے کہا کہ اگر عوام چاہتے ہیں کہ ملک میں سب کے لیے یکساں قانون ہو تو 27ستمبر کو باہر نکلنا ہوگا، اپنی تقدیر ہمیں خود بدلنی ہے، باہر سے کوئی نہیں آئے گا۔
وزیراعلیٰ نے نوجوانوں سے مخاطب ہوتے ہوئے کہا کہ انہیں فیصلہ کرنا ہوگا کہ وہ غلامی کی زندگی گزارنا چاہتے ہیں یا آزاد زندگی، اگر آزاد زندگی گزارنی ہے تو عمران خان کے ساتھ کھڑا ہونا اور اپنے مستقبل کے لیے باہر نکلنا ہوگا۔
انہوں نے کہا کہ زندگی، موت، عزت اور ذلت اللہ تعالیٰ کے دست قدرت میں ہے، اس لیے کسی سے ڈرنے کی ضرورت نہیں، اپنے حقوق کا دفاع کرنا ہوگا۔
محمد سہیل آفریدی نے کارکنوں اور عوام پر زور دیا کہ وہ اپنی منزل پر نظر رکھیں، تیار رہیں اور ایمان و یقین کے ساتھ آگے بڑھتے رہیں، کامیابی ان کا مقدر ہوگی۔