ضلع اپر چترال میں 169 ملین روپے کی لاگت سے جوان مرکز کا سنگ بنیاد رکھ دیا گیا

ڈپٹی سپیکر خیبر پختونخوا اسمبلی محترمہ ثریا بی بی نے ضلع اپر چترال میں 169 ملین روپے کی لاگت سے تعمیر ہونے والے جوان مرکز (ڈسٹرکٹ یوتھ آفس) کا سنگ بنیاد رکھ دیا۔ یہ منصوبہ محکمہ کھیل و امور نوجوانان خیبر پختونخوا کے زیرِ انتظام قائم کیا جا رہا ہے، جس کا مقصد ضلع کے نوجوانوں کو جدید سہولیات، ہنر مندی اور روزگار کے بہتر مواقع فراہم کرنا ہے۔
جوان مرکز نوجوانوں کے لیے ایک جامع پلیٹ فارم ثابت ہوگا جہاں کیریئر کونسلنگ، آئی ٹی اور فنی تربیت، نفسیاتی و سماجی معاونت، کاروباری رہنمائی، کو-ورکنگ اسپیسز، بزنس انکیوبیشن سپورٹ اور مائیکرو فنانس سہولیات فراہم کی جائیں گی۔ اس کے علاوہ نوجوانوں کو احساس نوجوان پروگرام کے تحت بلا سود قرضوں اور دیگر سرکاری پروگراموں سے متعلق رہنمائی بھی میسر ہوگی تاکہ وہ اپنے کاروبار شروع کرکے معاشی طور پر خودمختار بن سکیں۔
مرکز میں جدید آڈیٹوریم بھی قائم کیے جائیں گے جہاں نوجوانوں کی قیادت میں ورکشاپس، سیمینارز، ثقافتی تقریبات اور تربیتی پروگرام منعقد کیے جائیں گے، جو نوجوانوں میں قیادت، تخلیقی صلاحیتوں اور سماجی شمولیت کو فروغ دیں گے۔
اس موقع پر ڈپٹی سپیکر ثریا بی بی نے کہا کہ صوبائی حکومت نوجوانوں کو بااختیار بنانے، انہیں جدید مہارتوں سے آراستہ کرنے اور ترقی کے یکساں مواقع فراہم کرنے کے لیے سنجیدہ اقدامات کر رہی ہے۔ انہوں نے کہا کہ یہ جوان مرکز اپر چترال کے نوجوانوں کے لیے امید، ترقی، اختراع اور روشن مستقبل کی ایک نئی علامت ثابت ہوگا اور ایک ہنر مند، بااعتماد اور خود کفیل نسل کی تشکیل میں اہم کردار ادا کرے گا