ضلع سوات کے علاقے مٹہ بالا سور میں ایک نامعلوم خاتون کو بے دردی سے قتل کر دیا گیا، جبکہ جائے وقوعہ سے ایک کمسن بچی بھی برآمد ہوئی ہے، جس کے بعد علاقے میں خوف و ہراس پھیل گیا ہے۔
پولیس کے مطابق واقعہ مٹہ بالا سور میں ملابابا مقبرہ کے قریب پیش آیا، جہاں مقامی افراد نے ایک خاتون کی خون میں لت پت لاش دیکھی اور فوری طور پر پولیس کو اطلاع دی۔ اطلاع ملتے ہی پولیس کی نفری موقع پر پہنچ گئی اور علاقے کو گھیرے میں لے کر شواہد اکٹھے کرنا شروع کر دیے۔
ابتدائی تحقیقات کے مطابق خاتون کو چھری کے وار کرکے قتل کیا گیا۔ پولیس کا کہنا ہے کہ مقتولہ کو انتہائی بے دردی سے نشانہ بنایا گیا، تاہم قتل کے محرکات تاحال معلوم نہیں ہو سکے۔ واقعے کے بعد ملزمان موقع سے فرار ہونے میں کامیاب ہو گئے۔
پولیس حکام کے مطابق مقتولہ کی لاش کے قریب ایک کمسن بچی بھی موجود تھی، جسے حفاظتی تحویل میں لے لیا گیا ہے۔ بچی کی صحت اور تحفظ کو یقینی بنانے کے لیے ضروری اقدامات کیے جا رہے ہیں۔
لاش کو قانونی کارروائی اور پوسٹ مارٹم کے لیے ہسپتال منتقل کر دیا گیا ہے، جبکہ مقتولہ کی شناخت کے لیے کوششیں جاری ہیں۔ حکام کا کہنا ہے کہ جائے وقوعہ سے اہم شواہد اکٹھے کیے جا رہے ہیں اور مختلف پہلوؤں سے تفتیش کا آغاز کر دیا گیا ہے۔
پولیس نے نامعلوم ملزمان کی تلاش شروع کر دی ہے اور واقعے کو انتہائی حساس قرار دیتے ہوئے کہا ہے کہ جلد حقائق سامنے لانے اور ذمہ دار عناصر کو گرفتار کرنے کے لیے تمام دستیاب وسائل بروئے کار لائے جا رہے ہیں
