منصوبے کے ترقیاتی اہداف پر پیش رفت غیر تسلی بخش، معاشی حالات، ادارہ جاتی صلاحیت، مالیاتی انتظام اور ماحولیاتی تقاضوں سے متعلق بڑے خطرات کی نشاندہی
ورلڈ بینک نے خیبر پختونخوا ہائیڈرو پاور اینڈ رینیوایبل انرجی ڈیولپمنٹ منصوبے کے ترقیاتی اہداف کی جانب پیش رفت کو جزوی طور پر غیر تسلی بخش قرار دیتے ہوئے معاشی حالات، ادارہ جاتی صلاحیت، مالیاتی انتظام اور ماحولیاتی تقاضوں سے متعلق نمایاں خطرات کی نشاندہی کی ہے۔
ورلڈ بینک کی جانب سے بدھ کو جاری کردہ تازہ ترین عوامی رپورٹ کے مطابق، 727 ملین ڈالر مالیت کے اس منصوبے کے مجموعی خطرات کی درجہ بندی بدستور نمایاں رکھی گئی ہے۔
منصوبے کی منظوری 2020 میں دی گئی تھی جبکہ اسے 30 نومبر 2027 تک مکمل کرنے کا ہدف مقرر کیا گیا ہے۔
تاہم، بینک نے منصوبے پر عمل درآمد کی مجموعی پیش رفت کو جزوی طور پر تسلی بخش قرار دیا ہے، جس سے ظاہر ہوتا ہے کہ بعض خدشات کے باوجود منصوبے پر کام آگے بڑھا ہے،
تاہم اس کے مقررہ ترقیاتی اہداف کے حصول کے حوالے سے اب بھی تحفظات موجود ہیں۔
منصوبے کا بنیادی مقصد خیبر پختونخوا میں صوبائی اداروں کی استعداد کار کو بہتر بنانا اور قابلِ تجدید ذرائع سے بجلی کی پیداوار میں اضافہ کرنا ہے۔
ورلڈ بینک کی جائزہ رپورٹ میں کہا گیا ہے کہ ملک کی معاشی صورتحال، ادارہ جاتی صلاحیت، مالیاتی و انتظامی معاملات اور ماحولیاتی و سماجی تقاضے منصوبے پر عمل درآمد کے لیے نمایاں خطرات ہیں۔
دوسری جانب سیاسی و انتظامی امور اور منصوبے کے تکنیکی ڈیزائن سے متعلق خطرات کو درمیانے درجے میں رکھا گیا ہے۔
ورلڈ بینک ممکنہ مسائل کے رونما ہونے کے امکانات اور ان کے ممکنہ اثرات کی شدت کو مدنظر رکھتے ہوئے خطرات کی چار اقسام مقرر کرتا ہے، جن میں زیادہ، نمایاں، درمیانے اور کم درجے کے خطرات شامل ہیں۔
رپورٹ کے مطابق، بینک نے منصوبے کے دائرہ کار اور مالیاتی انتظامات میں بھی تبدیلیاں کی ہیں تاکہ انہیں حکومت کی عمل درآمد سے متعلق ترجیحات کے مطابق بنایا جا سکے۔
ترقیاتی اہداف کے حوالے سے خدشات کے باوجود ورلڈ بینک نے منصوبے پر عمل درآمد کی سرگرمیوں میں بہتری کی نشاندہی کی ہے، بالخصوص گبرال کالام پن بجلی منصوبے میں پیش رفت کو اہم قرار دیا ہے۔
جائزہ رپورٹ کے مطابق گبرال کالام منصوبے پر تعمیراتی کام شروع ہو چکا ہے، زمین کے حصول میں پیش رفت ہوئی ہے جبکہ الیکٹرو مکینیکل آلات کی خریداری کا عمل بھی آگے بڑھا ہے۔
ورلڈ بینک کا کہنا ہے کہ ان اقدامات سے منصوبے پر عمل درآمد کی رفتار میں دوبارہ بہتری آئی ہے، تاہم مقررہ اہداف کے حصول کے لیے تعمیراتی کام بروقت مکمل کرنا اور معاہدوں کا مثر انتظام ضروری ہے۔
ورلڈبینک نے اس بات پر بھی زور دیا ہے کہ منصوبے پر عمل درآمد کے تمام مراحل میں ماحولیاتی اور سماجی تحفظ کے تقاضوں پر مکمل عمل درآمد یقینی بنایا جائے۔