عوامی نیشنل پارٹی نے سابق مئیر مردان حمایت اللہ مایار کو پارٹی ڈسپلن اور آئینی اصولوں کی مبینہ خلاف ورزی پر شوکاز نوٹس جاری کر دیا ہے۔
حمایت اللہ مایار سے تین دن کے اندر وضاحت طلب کی گئی ہے کہ آیا وہ بیک وقت کسی دوسری تنظیم کے رکن ہیں، اور اگر ہیں تو کیا یہ عمل اے این پی کے آئین کے مطابق ہے۔
نوٹس میں اس امر پر بھی سخت تشویش کا اظہار کیا گیا ہے کہ جس تنظیم کے ساتھ ان کی وابستگی کی اطلاعات ہیں، اس کا مقصد پختونوں کو قبائلی بنیادوں پر تقسیم کرنا ہے، جو کہ باچا خان کے فلسفے اور جدوجہد کے سراسر منافی ہے۔
پارٹی کا کہنا ہے کہ وہ ہمیشہ قبائلی تقسیم کے خلاف اور پختون قوم کے اتحاد، شعور اور ترقی کے لیے جدوجہد کرتی رہی ہے، اور کسی بھی رکن کی جانب سے اس نظریے سے انحراف برداشت نہیں کیا جائے گا۔
مزید کہا گیا ہے کہ اگر تسلی بخش جواب نہ دیا گیا تو پارٹی آئین کے مطابق سخت تادیبی کارروائی عمل میں لائی جائے گی۔
