پشاور: تہکال پایان میں گھر میں آتشزدگی، میاں بیوی سمیت 6 افراد جاں بحق
پشاور کے علاقے تہکال پایان میں ایک رہائشی گھر میں خوفناک آتشزدگی کے نتیجے میں ایک ہی خاندان کے چھ افراد جاں بحق ہوگئے۔
ریسکیو 1122 کے مطابق آگ مکان کے اس حصے میں لگی جہاں فرنیچر، فوم اور دیگر سامان رکھا ہوا تھا۔ اطلاع ملتے ہی ریسکیو ٹیمیں موقع پر پہنچیں اور بروقت کارروائی کرتے ہوئے آگ پر قابو پالیا۔
ریسکیو حکام کا کہنا ہے کہ سرچ آپریشن کے دوران ایک کمرے سے چھ افراد کی لاشیں برآمد ہوئیں، جن میں میاں، بیوی اور ان کے چار بچے شامل ہیں۔ ابتدائی معلومات کے مطابق اموات آگ کی شدید تپش اور دھوئیں کے باعث دم گھٹنے سے ہوئیں۔
جاں بحق افراد کی شناخت سراج (55 سال)، ان کی اہلیہ (40 سال)، حنایا (9 سال)، حریرہ (11 سال)، منہال (3 سال) اور حسنین (4 سال) کے ناموں سے ہوئی ہے۔
ریسکیو 1122 کے مطابق آگ لگنے کی وجوہات تاحال معلوم نہیں ہوسکیں، جبکہ واقعے کی تحقیقات جاری ہیں۔
