محکمہ ایکسائز خیبرپختونخوا نے صوبے میں منشیات کے خلاف کارروائیاں تیز کرتے ہوئے پشاور اور مردان میں متعدد کامیاب آپریشنز کیے ہیں، جن کے دوران بھاری مقدار میں چرس اور نشہ آور گولیاں برآمد کر کے ملزمان کو گرفتار کر لیا گیا۔
محکمہ ایکسائز حکام کے مطابق انسدادِ منشیات کارروائیوں کے دوران مجموعی طور پر 63 کلو گرام سے زائد چرس اور تقریباً 1,060 نشہ آور گولیاں برآمد کی گئیں۔ تمام گرفتار ملزمان کے خلاف متعلقہ ایکسائز تھانوں میں مقدمات درج کر کے مزید تفتیش شروع کر دی گئی ہے۔
حکام کے مطابق پشاور میں پہلی کارروائی موٹروے ٹول پلازہ کے قریب قائم جوائنٹ چیک پوسٹ پر کی گئی، جہاں تلاشی کے دوران ملزم گل زیب ولد فضل واحد کے قبضے سے 2 ہزار 400 گرام چرس برآمد ہوئی۔ ملزم کو موقع پر گرفتار کر کے قانونی کارروائی شروع کر دی گئی۔
اسی طرح جوائنٹ چیک پوسٹ پشاور پر ایک مسافر گاڑی کی تلاشی کے دوران ملزم نوید جان ولد عبدالشید سکنہ ناگمان سے 1 ہزار 185 گرام چرس برآمد کی گئی اور اسے گرفتار کر لیا گیا۔
پشاور کے علاقے سپلائی گیٹ نہر، جی ٹی روڈ پر ایک اور کارروائی کے دوران ملزم حمید اللہ ولد شریف خان کے قبضے سے 1,060 نشہ آور گولیاں برآمد ہوئیں جن کا وزن تقریباً 432 گرام بتایا گیا ہے۔ ملزم کو حراست میں لے کر مقدمہ درج کر لیا گیا۔
دوسری جانب مردان میں بھی محکمہ ایکسائز نے منشیات اسمگلنگ کے خلاف کارروائیاں کیں۔ رنگ روڈ مردان پر ایک گاڑی نمبر RIP-307 کی تلاشی کے دوران 12 ہزار گرام چرس برآمد ہوئی، جبکہ ملزم نور ملک ولد علی حیدر سکنہ چارسدہ کو گرفتار کر لیا گیا۔
مردان میں ہی ایک اور بڑی کارروائی کے دوران گاڑی نمبر GAH-8888 سے 48 ہزار گرام چرس برآمد کر کے منشیات اسمگلنگ کی کوشش ناکام بنا دی گئی۔ کارروائی کے بعد مزید قانونی کارروائی جاری ہے۔
محکمہ ایکسائز حکام کا کہنا ہے کہ صوبے کو منشیات سے پاک بنانے کے لیے منشیات فروشوں اور اسمگلروں کے خلاف بلاامتیاز کارروائیاں جاری رکھی جائیں گی۔ حکام کے مطابق چیک پوسٹوں، شاہراہوں اور حساس مقامات پر نگرانی مزید سخت کر دی گئی ہے تاکہ منشیات کی نقل و حمل کو روکا جا سکے۔
