نوشہرہ میں رات گئے لگنے والی خوفناک آگ نے تباہی مچا دی، جس کے نتیجے میں 200سے زائد دکانیں جل کر خاکستر ہوگئیں جبکہ کروڑوں روپے مالیت کا سامان تباہ ہونے کی اطلاعات ہیں۔
مقامی ذرائع کے مطابق آگ نامعلوم وجوہات کی بنا پر بھڑکی اور دیکھتے ہی دیکھتے پورے بازار کو اپنی لپیٹ میں لے لیا۔
آگ کی شدت اتنی زیادہ تھی کہ متعدد دکانوں میں موجود سامان کو بچانے کا موقع بھی نہ مل سکا۔
ذرائع کا کہنا ہے کہ متاثرہ دکانوں میں کپڑوں، چپلوں، منیاری اشیا، الیکٹرانکس اور دیگر کاروباری سامان کے بڑے ذخائر موجود تھے جو مکمل طور پر جل کر راکھ بن گئے۔
عینی شاہدین کے مطابق آگ نے چند گھنٹوں کے دوران پورے بازار کو اپنی لپیٹ میں لے لیا اور ہر دکان میں موجود لاکھوں روپے مالیت کا سامان خاکستر ہوگیا، جس سے تاجروں کو بھاری مالی نقصان پہنچا ہے۔
ابتدائی اطلاعات کے مطابق آتشزدگی سے کروڑوں روپے کے نقصانات کا خدشہ ظاہر کیا جا رہا ہے جبکہ متعلقہ ادارے آگ لگنے کی وجوہات جاننے اور نقصانات کا تخمینہ لگانے میں مصروف ہیں۔
واقعے کے بعد متاثرہ تاجروں نے حکومت سے فوری مالی امداد اور نقصانات کے ازالے کا مطالبہ کرتے ہوئے کہا ہے کہ ان کی زندگی بھر کی جمع پونجی چند گھنٹوں میں راکھ بن گئی۔
