پاکستان کے دورے پر آئے ایرانی وزیرخارجہ نے فیلڈ مارشل سید عاصم منیر سے اہم ملاقات کی ۔ فیلڈمارشل سے ملاقات کے دوران اہم امور سمیت دو طرفہ تعاون پر تبادلہ خیال کیا گیا، جبکہ اس دوران علاقائی صورتحال بھی زیر بحث رہی۔سفارتی ذرائع کے مطابق چیف آف ڈیفنس فورسز فیلڈمارشل عاصم منیرسے ایرانی وزیرخارجہ عباس عراقچی کی یہ پہلی باضابطہ ملاقات تھی، ایرانی سفارتخانے کے مطابق ایرانی وفد وزیر خارجہ عباس عراقچی کی سربراہی میں وزیراعظم شہباز شریف سے بھی ملاقات کرے گا، اس موقع پر وزیر خارجہ اسحاق ڈار اور عسکری قیادت بھی موجود ہوگی۔ اس حوالے سے امکان ظاہر کیا جا رہا ہے کہ ملاقات میں ایران امریکا دوسرے دور کے مذاکرات سے متعلق بھِ بات چیت کی جائیگی، جبکہ ایرانی وزیر خارجہ صدر مسعود پزشکیان کا پیغام بھی وزیراعظم تک پہنچائیں گے، اس کے علاوہ وزیر خارجہ اسحاق ڈار سے ایرانی ہم منصب کی الگ ملاقات بھی ہوگی فیلڈ مارشل سے ملاقات کے دوران ایران اور پاکستان کے درمیان علاقائی سکیورٹی اور دوطرفہ تعاون پر تبادلہ خیال کیا گیا۔ ملاقات میں محسن نقوی اور مشیر قومی سلامتی جنرل عاصم ملک موجود تھے جبکہ ایرانی وفد میں نائب وزیر خارجہ غریب آبادی، سفیر رضا امیری مقدم اور ترجمان وزارت خارجہ اسماعیل بقائی شامل رہے۔
