صوبائی ڈیزاسٹر مینجمنٹ اتھارٹی (پی ڈی ایم اے) نے خبردار کیا ہے کہ خیبرپختونخوا کے بیشتر اضلاع میں 2 سے 4 اپریل کے دوران گرج چمک کے ساتھ تیز بارشوں کا امکان ہے، جس کے باعث مختلف علاقوں میں فلیش فلڈ اور پانی کی سطح میں اضافے کا خدشہ ظاہر کیا گیا ہے۔
پی ڈی ایم اے کے مطابق بنوں، لکی مروت، ہنگو، کوہاٹ، اورکزئی، کرم، خیبر، پشاور، نوشہرہ، چارسدہ، مہمند، ملاکنڈ، مردان، صوابی، اپر و لوئر دیر، شانگلہ، سوات، اپر و لوئر چترال، ڈیرہ اسماعیل خان، ہری پور، ایبٹ آباد، مانسہرہ، بٹگرام، کولائی پالس اور اپر و لوئر کوہستان سمیت بیشتر اضلاع میں موسلادھار بارش متوقع ہے۔
ادارے نے خبردار کیا ہے کہ تیز بارشوں کے باعث دریائے کابل اور اس سے ملحقہ ندی نالوں میں پانی کی سطح بڑھ سکتی ہے، جس کے پیش نظر متعلقہ اضلاع کی انتظامیہ کو فلیش فلڈ وارننگ جاری کر دی گئی ہے۔
پی ڈی ایم اے کے مطابق سوات، چترال، دیر، بونیر اور شانگلہ سمیت دیگر حساس اضلاع میں فلیش فلڈ کا زیادہ خطرہ ہے، جہاں نشیبی علاقوں میں سیلابی صورتحال پیدا ہو سکتی ہے۔
صوبائی ادارے نے ضلعی انتظامیہ کو ہدایت کی ہے کہ وہ نشیبی اور حساس علاقوں میں الرٹ رہیں اور کسی بھی ہنگامی صورتحال سے نمٹنے کے لیے پیشگی اقدامات یقینی بنائیں۔
پی ڈی ایم اے نے دریائے کابل کے کنارے آباد افراد کو محتاط رہنے اور احتیاطی تدابیر اختیار کرنے کی تاکید کی ہے، جبکہ ضلعی انتظامیہ کو ہدایت کی گئی ہے کہ ممکنہ خطرے سے دوچار آبادی کی بروقت محفوظ مقامات پر منتقلی یقینی بنائی جائے۔
مزید برآں کسانوں اور مویشی پال حضرات کو ہدایت دی گئی ہے کہ وہ اپنے مویشی محفوظ مقامات پر منتقل کریں، جبکہ نشیبی علاقوں میں غیر ضروری نقل و حرکت سے گریز کرنے کی بھی تاکید کی گئی ہے تاکہ کسی بھی ممکنہ نقصان سے بچا جا سکے۔
