ضلع کرم کے وسطی علاقے ٹنڈوری میں میں کواڈ کاپٹر حملہ، خاتون سمیت 4افراد جاں بحق،8زخمی

ضلع کرم کے وسطی علاقے ٹنڈوری میں ایک مبینہ کواڈ کاپٹر حملے کے نتیجے میں خاتون سمیت 4چار افراد جاں بحق جبکہ 8شدید زخمی ہوگئے۔
مقامی ذرائع کے مطابق واقعہ رات کے وقت پیش آیا جب ایک گھر پر مبینہ طور پر کواڈ کاپٹر کے ذریعے حملہ کیا گیا۔ حملے کے نتیجے میں مکان کو شدید نقصان پہنچا اور گھر میں موجود افراد ملبے تلے دب گئے۔
واقعے کی اطلاع ملتے ہی مقامی افراد اور امدادی کارکن جائے وقوعہ پر پہنچ گئے اور امدادی سرگرمیاں شروع کر دیں۔
مقامی لوگوں نے ملبے سے لاشوں اور زخمیوں کو نکال کر قریبی طبی مراکز منتقل کیا۔
ذرائع کے مطابق جاں بحق ہونے والوں میں ایک خاتون بھی شامل ہے جبکہ چار زخمی افراد کو ابتدائی طبی امداد فراہم کرنے کے بعد مزید علاج کے لیے پشاور منتقل کر دیا گیا ہے۔
ہسپتال ذرائع کا کہنا ہے کہ بعض زخمیوں کی حالت تشویشناک بتائی جا رہی ہے۔
واقعے کے بعد پورے علاقے میں خوف و ہراس کی فضا پھیل گئی جبکہ شہریوں میں شدید بے چینی پائی جا رہی ہے۔
مقامی عمائدین اور عوامی حلقوں نے واقعے کی فوری اور شفاف تحقیقات کا مطالبہ کرتے ہوئے ذمہ داران کا تعین کرنے پر زور دیا ہے۔
تاحال کسی سرکاری ادارے کی جانب سے حملے کی نوعیت یا اس کے محرکات کے حوالے سے باضابطہ موقف سامنے نہیں آیا، تاہم واقعے کی مختلف پہلوئوں سے تحقیقات جاری ہیں۔