سوات (مانیٹرنگ ڈیسک):
خیبر پختونخوا کے ضلع سوات کے علاقے کبل چوک میں امن کے حق میں جاری مظاہرے کے دوران کبل تھانہ کے گیٹ پر خودکش دھماکہ کے نتیجے میں پو لیس اہلکاروں سمیت7 افراد شہید اور 30سے زائد زخمی ہو گئے
عینی شاہدین کے مطابق دھماکہ اس وقت ہوا جب شہری بڑی تعداد میں امن ریلی میں شریک تھے۔ دھماکے کے فورا بعد علاقے میں شدید خوف و ہراس پھیل گیا، جبکہ ہر طرف بھگدڑ مچ گئی۔ زخمیوں کی مدد کے لیے مقامی افراد بھی فوری طور پر متحرک ہو گئے۔
ریسکیو 1122 کی متعدد ایمبولینسیں اور قانون نافذ کرنے والے اداروں کی بھاری نفری موقع پر پہنچ گئی۔ زخمیوں کو ابتدائی طبی امداد فراہم کرنے کے بعد قریبی ہسپتالوں میں منتقل کیا جا رہا ہے، جبکہ بعض زخمیوں کی حالت تشویشناک بتائی جا رہی ہے۔
پولیس زرائع کے مطابق دھماکے میں متعدد پولیس اہلکاروں سمیت 30 سے زائد افراد زخمی بھی ہوئے ہیں۔ انہوں نے بتایا کہ دھماکے کی نوعیت کا تعین کرنے کے لیے تحقیقات شروع کر دی گئی ہیں اور شواہد اکٹھے کیے جا رہے ہیں۔
پولیس نے جائے وقوعہ کو گھیرے میں لے کر سرچ آپریشن شروع کر دیا ہے، جبکہ بم ڈسپوزل یونٹ اور فرانزک ٹیموں کو بھی طلب کر لیا گیا ہے تاکہ دھماکے کی وجوہات اور ذمہ داروں کا تعین کیا جا سکے۔
